Jekeshelendirý qadamdary

Elbasy N.Nazarbaev óziniń «Qazaqstan jańa jahandyq naqty ahýalda: ósim, reformalar, damý» atty jańa Joldaýynda da, «Ult Jospary – qazaqstandyq armanǵa bastaıtyn jol» atty maqalasynda da memleket ıeliginen shyǵarý men jekeshelendirýge úlken basymdyq beriletinin atap aıtqan bolatyn. Memleket ıeligindegi aktıvterdi basqarýdyń paıdaly joly jekemenshikke ádil naryq baǵasymen satylyp, tıimdi paıdalaný reformalardyń basty baǵyttarynyń biri bolýy kerektigi de Úkimetke berilgen tapsyrmalarda aıqyn kórsetilgen. Búgingi tańda bul tapsyrma qyzý oryndalyp jatyr. Qarjy mınıstrliginiń sońǵy derekterine qaraǵanda, jekeshelendirýdiń 2014-2016 jyldarǵa arnalǵan keshendi jospary boıynsha satylǵan memlekettik menshik nysandarynan bıýdjetke barlyǵy 5 mlrd. 509 mln. teńge kiris tústi. Mınıstrliktiń veb-saıtyndaǵy málimetterge sáıkes, 2014-2016 jyldarǵa arnalǵan satý kestesi boıynsha 833 nysan satýǵa jos­par­lanǵan. 2016 jyldyń 5 qańta­ryndaǵy málimetke sáıkes, sonyń 428-i satýǵa shyǵarylyp, 229-y jańa ıe­lerin tapty. Joǵa­ryda atal­ǵan kiris solardy satý­dan túsip, bıýd­jettiń tabys bóligin tolyq­tyrdy. Atalǵan nysan­dar­dyń 15-i respýblıkalyq, 114-i kommýnaldyq menshikte bolǵan edi. Sondaı-aq, áleýmettik kásipkerlik korporasııalar (ÁKK) menshiginde bolǵany – 60, al qalǵan 50-i holdıngterdiń esebinde bolǵan. Aıta ketetin jaıt, 2014-2016 jyl­dardaǵy satý kestesine sáıkes respýblıkalyq menshikten barlyǵy – 41, kommýnaldyq men­shikten – 243, ÁKK-den – 109, ulttyq kompanııalardan 111 nysan satýǵa qoıylady. Aıan QÝANDYQ.