Eldiktiń eńsesin bıiktetetin sheshim

Bıyl Qazaqstan úshin erekshe jyl, el Táýel­siz­digine 25 jyl tolady. Biraq, qazir álemde úlken daǵdarys bolyp jatyr. Daǵdarys úlken elder­di de, kishi elderdi de qam­tydy. Mysaly, Qytaıǵa da, Reseıge de, basqa elderdiń bárine de daǵdarys óz zardabyn tıgizýde. Barlyq mem­lekettiń sol daǵdarystan qalaı shyǵýdy oılastyryp, jantalasyp jatqan jaıy bar. Bizdiń Qazaqstandy alatyn bolsaq, Prezıdentimiz memlekettiń jumysyn, onyń apparatyn kásibılendirý jumysyn jaqsartý jóninde Ult Josparyn júzege asyrý boıynsha el aldyna asqaraly mindet qoıdy. Sol mindetterdiń ishinde, ásirese, 5 ınstıtýttyq reformanyń orny bólek. Endigi jerde memlekettiń júıesi osy reformaǵa sáıkes damýy kerek. Al demokratııalyq memlekette jumys isteý degenniń ózi – zańmen jumys isteý degen sóz. Zań sapalyq jaǵynan eń joǵary dárejede bolýy tıis. Zańdy qabyldaıtyn Parlament. Parlament – memlekettik bıliktiń bir tarmaǵy. Sol sebepti, zańdy qabyldaıtyn depýtattardyń jaýapkershiligi óte úlken. Qazirgideı qıyn-qystaý jaǵdaıda depýtattar oılanyp-tolǵanyp, depýtattyq korpýsqa, ásirese, Májiliske bilikti, deńgeıleri joǵary, zamanǵa saı, Ult Josparyn kásibı turǵyda júzege asyra alatyn depýtattardyń kelgeni durys degen toqtam jasady. Sóıtip, ózderiniń ókilettikterin merziminen buryn toqtatý jóninde Prezıdentke usynys jasady. Memleket basshysy olardyń usyny­syn qabyldap, Besinshi shaqyrylǵan Par­lament Májilisin taratý jóninde, sondaı-aq, Parlament Májilisi depýtattarynyń kezekten tys saılaýyn taǵaıyndaý týraly Jarlyqqa qol qoıdy. Shynynda da, biz­diń ómirimiz, taǵdyrymyz memleketpen, onyń ishinde memlekettiń zańymen tike­leı baılanysty. Depýtattar eń sapaly zańdardy qabyldaıtyn bolsa, onda biz­diń ha­lyqtyń ál-aýqatynyń artýyna da, mem­lekettiń damýyna da eleýli úles qosady. Aıta ketetin taǵy bir másele, Parla­ment Májilisine saılaý jańa depýtat­tardyń kelýine múmkindik beredi, partııa­lardyń da belsendiligin arttyrýyna jol ashady. Partııalar Májiliske ózderiniń qoldarynan is keletin, bilikti tulǵalaryn usynýlary kerek. Qoryta aıtqanda, Elbasynyń osyndaı salıqaly sheshimin qoldaımyn, halyqty da sony qoldaýǵa shaqyramyn. Jabaıhan ÁBDILDIN, akademık. ASTANA.