AQMOLA. 25 qańtar. Aqmola oblysynyń Selınograd aýdanyndaǵy Rodına aýylynda «Nurly jol» baǵdarlamasymen 4 úı paıdalanýǵa berildi. Bul týraly egemen.kz tilshisi habarlady.
Oblys ákimi atalǵan aýyldaǵy qonys toıǵa qatysyp, qýanysh ıelerin quttyqtady. Ol jergilikti turǵyndarmen birge jańa úıdiń kiltin alǵan Erlan Tasbolatovtyń shańyraq shattyǵynyń kýási boldy.
«Qazaqstan Prezıdenti Nursultan Ábishulynyń halyq turmysyn jaqsartý baǵytyndaǵy saıasatynyń arqasynda shalǵaı eldi mekenderde de zamanalyq jańa úılerge qoljetimdilik ornyqty. Shańyraqtaryńyz shattyqqa tolyp, otbasylyq berekege bólenińizder. Búgin óz atymnan Tasbolatovtyń otbasyna teledıdar syılaımyn», – dedi oblys ákimi Sergeı Kýlagın. Sondaı-aq, «Rodına» agrofırmasy» jaýapkershiligi shekteýli seriktestiginiń bas dırektory, Qazaqstannyń Eńbek Eri Ivan Saýer: ««Nurly Jol» baǵdarlamasymen 2016 jyldyń birinshi jarty jyldyǵynda 14 úı paıdalanýǵa beriledi. Búgin osy úıdiń 4-ýi tolyq aıaqtalyp, turǵyndar máre-máre bolýda. Jyl aıaǵyna deıin qalǵan úılerdiń qurylysyn aıaqtaımyz», – dedi.
Shara barysynda Ivan Saýer oblys ákimi men jýrnalısterdi 1000 bas saýyn sıyryna arnalǵan mal sharýashylyǵy kesheni qurylysynyń barysymen tanystardy. Jobalyq quny 1 mıllıard 10 mıllıon teńge turatyn bul nysan ústimizdegi jyldyń birinshi toqsanynda jumysqa qosylady dep kútilýde.
Jańa qurylystar qarqyn alǵan sharýashylyqta óskeleń talaptarǵa tolyq saı keletin astyq termınaly salynyp jatqanyn kórdik. Sıymdylyǵy 20 000 tonnalyq termınalda astyqty tazalaý, keptirý, saqtaý jáne naryqqa shaǵarýdyń klasterlik júıesi qamtamasyz etiledi.
Baqbergen Amalbek.
Derek, sýret: egemen.kz.
