«Barys» óz aıdynynda «Neftehımıkten» jeńildi

ASTANA. 25 qańtar. Búgin Qurlyqtyq hokkeı lıgasy sheńberinde «Barys» óz aıdynynda Nıjnekamskiniń «Neftehımıgin» qabyldap, 1:2 esebimen ese jiberdi. Bul týraly egemen.kz tilshisi habarlady. Birinshi kezeńde esep ashylǵan joq. 9-mınýtta qonaqtar sapynan eki birdeı oıynshy aıdynnan qýylyp, «Barys» 5h3 formatynda oınaýǵa múmkindik aldy. Alaıda, Andreı Nazarovtyń shákirtteri bul múmkindikti tıimdi paıdalana almady. Esesine, ekinshi kezeńniń sońynda «Neftehımık» oıynshy basymdyǵyn júzege asyryp, alǵa shyqty. Atap aıtqanda, 40-mınýtta Nıkıta Shıtov mergendigimen kózge tústi. Bul kezde «Barystyń» úzdik hokkeıshileriniń biri Naıdjel Doýs jazalanǵan bolatyn. Taǵy bir eskere keter jaıt, ekinshi bólikte bizdiń komanda eki ret oıynshy basymdyǵyna ıe bolyp, ekeýin de múlt jiberdi. Matchtyń sońynda, ıaǵnı 54-mınýtta astanalyqtar Kevın Dallmenniń kómegimen tarazy basyn teńestirgenimen, arada 4 mınýt ótkende, óz qaqpalaryna ekinshi shaıbany jiberip aldy. Dál osy gol oıyn taǵdyryn sheshti. Jeńis golynyń avtory – Igor Polygalov. Osymen «Barys» qatarynan ekinshi ret jeńilip otyr. Qorjynynda 78 upaıy bar elordalyqtar ázirge Shyǵys konferensııasynda 7-orynda keledi. Al 9-orynda turǵan, «Barystyń» pleı-off joldamasyna talasta negizgi qarsylasy – «Neftehımık» búgingi jeńisinen keıin upaı sanyn 75-ke jetkizip, jaǵdaıyn aıtarlyqtaı jaqsartyp aldy. «Barys» kelesi kezdesýin 27 qańtarda óz aıdynynda Chelıabiniń «Traktorymen» ótkizedi. Elaman Qońyr. Derek: egemen.kz. Sýret: hcbarys.kz.