Kishkentaı Ásemniń úmit jibi

Jumysta jazýymdy jazyp otyr edim, jylt etip, hat kel­di degen habarlama tústi. Hat áleý­mettik jelidegi dostarymnyń biri– Dáýlet Ahmetjanov degen azamattan eken. Dostyǵyn qa­byldaǵannan ózge qadam jasal­maǵan múlde beıtanys jan. «Meniń ortanshy qyzym óte qatty naýqas. Biz Koreı elindegi emimizdi ári qaraı jalǵastyra almaımyz. О́tinem kómektesińizshi! Bul ne qylǵan uıatsyz adam dep sóge kórmeńiz, bul úmiti úzilerdeı bolyp, sońǵy dármenmen qarmanǵan ákeniń qımyly. Barlyq aqparat meniń paraqshamada» degen hat eken. Ánsheıinde áleýmettik jeli­lerde mundaı kómek suraý­shy­lardyń qatary óte mol, alaıda dál osylaı tanymaıtyn adamǵa jeke hat jazý bola bermeıdi. Solardyń ózin oqyp otyryp júregiń aýyryp, qolyńnan keleriń joq qınalyp júrgende myna hat meniń bar ishki álemimdi qozǵap jiberdi. О́tkende Orta­lyq kommýnıkasııalar ortalyǵynda bala quqyǵyna qatysty ótken brıfıngte bir usynys aıtqan edik. Áleýmettik jeli arqyly janaıqaılaryn syrtqa shyǵaryp, aýrý balama kómektes deıtin jandardyń qatary kóp, solarǵa monıtorıng júrgizilip, naqty kómek kórsetýdiń sharalaryn qa­rastyrýdyń joldaryn izdes­tirseńizder, áıtpese aılyǵy shaı­lyǵyna jetpeı júrgen qara­­paıym adamdar qınalady. Qoǵam­­da Úkimet kómektespeıdi de­gen, bılikke teris pıǵyl qalyp­ta­sady. Qazir bizde nebir qu­ryl­­ǵylarmen, mamandarmen jetil­­dirilgen klınıkalar bar, solar­dyń múmkindikterin paıdalanyp, hali múshkil jan­darǵa aldyńǵy kezekte kómek kórsetilse, degen­biz. Sol joly brıfıng sońy­nan usynysyńyzǵa rahmet, dep esimhatyn bergen laýa­zym ıesi esime túsip, Dáýlet Ahmet­janovtyń paraqshasyna kirdim. О́zine hat jazdym. Dáýletten tómendegideı jaýap keldi. «Balama elimizde durys dıagnoz qoıylmaı, sımtomdyq emdi úıge jalǵastyrýǵa keńes berip keri qaıtarǵan soń, Más­keýde, Úrimjide boldyq. Olar da kómektese almaımyz dedi. Al Koreıada professor Iý emdep jazý­ǵa bolady dep otyr. Bizdegi Ana men bala ortalyǵynyń dári­gerleri muńymyzǵa selqos qara­dy. Elektrondy adresińizdi ber­seńiz ortalyqpen jazysqan hat­tar men qujattarymyzdy jibe­reıin», dedi. Adam emes, qujat sóıleıtin, qujatqa senetin ýaqytta emdeý mekemeleri men kishkentaı Ásemniń ákesi arasyndaǵy hattar biraz jaıdy ańǵartqandaı. Alǵashynda nefroblastoma dıagnozymen Ana men bala Ulttyq ǵylymı-zertteý ortalyǵynda emdelgen 5 jastaǵy Ásem Ahmet­janovaǵa osy jerde hımııalyq em­niń 3 satysyn alyp, sodan keıin qaterli isikti sylyp alý­ǵa ota jasalynady. Ota jasal­ǵanda alynǵan isiktiń bólshegi gıstologııalyq zertteýden ótken­­de, Ásemge basqa dıagnoz qoıy­lady. О́tken jylǵy qara­sha aıynyń 27-si kúni aýrýhanadan shyqqan Ásemdi ata-anasy Qy­taıǵa aparyp emdetpek bol­ǵanda ondaǵy dárigerler bas tar­typ, jeltoqsannyń 11 kúni Ana men bala Ulttyq ǵylymı-zert­teý ınstıtýtyna qabyldaýǵa óti­nish jasalǵanda, atalǵan dıag­noz boıynsha emniń túri – ota bolyp sanalady, al sizdiń bala­ńyzǵa ota jasalynǵan, al Qazaq­standa tájirıbelik eksperıment turǵysynda em júrgizýge tyıym salynǵan, ári shetelder­de hımııalyq-sáýlelik em qabyl­daýdyń oń nátıjeleri joq, degen mazmunda jaýap alynady. Dármensiz ata-ana 5 jasar bal­ǵynnyń kóz aldarynda semgenin qalamaı álemniń ozyq klınıkalaryna suraý salǵanda Seýldegi Severans klınıkasynan professor Iý úmit jibin qoldaryna ustatady. Dáýlet Ahmetjanov feıs­býk­tegi paraqshasynda bylaı dep ja­zady. «Bárińizge qaıyrly kún tileı­min! Sońǵy jańalyqty 17 qań­tarda jazǵan bolatynmyn. Osy kúnder ishinde professor Iý bastaǵan koreı dárigerleri sońǵy dıagnozdy qoıdy – nefroblastoma!!! 18 qańtardan 5 kúnge so­zylatyn hımııalyq em bastalady. Emniń alǵashqy kúnderin Ásem belgili dárejede jaqsy qabyldaýda. О́te kóp zertteýler, analızder tapsyryp jatyr. Biz munda qyzymyzdyń dertine daýa tabylatynyna úlken senim artamyz. Dárigerler óte bilikti, meıirbıkeler bar zeıinimen qaraıdy. Alaıda, klınıkanyń eń bir jaman jeri – baǵasynyń qymbattyǵy. Osyn­da ótken 15 kúnniń ishinde biz 22 myń dollar jumsadyq. Qar­jylyq jaǵdaıymyz asa qıyn. Kó­mek kórsete alatyn meıirimdi jan­dar­dyń qoldaýyna zárýmiz. Aýrýhana Ásemniń emine qatysty jalpy esepti búgin-erteń beredi. Osy rette mynadaı saýal týyndaıdy. Nege bizdiń memleket Iý tárizdi joǵary bilikti dárigerlerdi durys jalaqy tólep jumysqa shaqyrmaıdy. Máselen, Severans klınıkasynda bar-joǵy 4 professor, al olarǵa dúnıejúziniń barlyq aımaǵynan izdep kelip emdeledi. Eger elimizde osyndaı dárejedegi dárigerler bolsa, ata-analar balalarynyń ómiri úshin shekara aspas edi. Shirkin, balapanym óz elimizde emdelse» deıdi. Dáýlettiń armanynyń artynda qanshama oı jatyr... Kishkentaı Ásemge emiń shıpaly bolsyn deı otyryp, osy joldardy jazdym. Bálkim, siz Ásemniń qınalǵan ata-anasyna qolushyn berersiz. Nemese osy joldardy oqyp, biliktiligi asa joǵary deńgeıdegi Iý professor tárizdi dárigerlerdiń elimizge kelýine yqpal etersiz. Sóıtip, qınalǵan jandarǵa medet bolyp, aýrýyna em tabylýmen qosa, qıyn zamanda eldiń aqshasynyń shetel aspaı elde qalýyna septigińiz tıer. Anar TО́LEÝHANQYZY, «Egemen Qazaqstan».