Dinı basqarma qorytyndysy: ótken jyly 152 907 otbasyna qaıyrymdylyq jasaldy

Qazaqstan musylmandary dinı basqarmasynyń (QMDB) áleýmettik jaǵdaıy tómen jáne kómekke muqtaj jandarǵa, múgedek balalarǵa, ardagerlerge qaıyrymdylyq kómek kórsetý týraly tapsyrmasyna sáıkes, 2015 jyly elimizdiń ár óńirindegi meshitter tarapynan tabıǵat apatynan jáne basqa da jaǵdaılarǵa dýshar bolǵan azamattarǵa qaıyrymdylyq jasaldy. Osy oraıda, meshitterde «Qaıy­­rym­dylyq kerýeni», «Mek­tepke jol», «Qarttarǵa qurmet», «Muq­tajdyń muńyn bólis», «Bir balany kıindir», «Qaıyrym­dylyq – qaıyr­ly is», «Baryńmen bólis!» sekildi aksııalar men qaıy­rym­dylyq is-sharalary uıymdas­tyryldy. Qaraǵandy oblysyndaǵy sý tas­qy­nynan zardap shekken aımaq­tarǵa kómek kórsetilip, «Qaıy­rymdylyq kerýeni» aksııasynda 110 tonna turmysqa qajetti zattar taratyldy. «Mektepke jol» qaıyrym­dylyq sharasy barysynda tur­mysy tómen, ata-ana qamqor­lyǵynan aıyrylǵan, jetimder men kóp­balaly 5253 otbasyna oqýǵa qajetti quraldar men ár oqýshyǵa 20 000 teńge kóleminde kómek kórsetildi. «Qurban aıt» merekesinde muqtaj jandarǵa, áleýmettik jaǵ­daıy tómen otbasylar men memle­kettik mekemelerge respýb­lıka boı­ynsha 15 308 qurbandyq eti 23 419 otbasyna úlestirildi. Astana men Almaty qalalar­yndaǵy qarttar úılerine «Úl­ken qajylyq» jáne «Kishi qajy­lyqqa» tegin joldama berildi. Dinı basqarmanyń bastamasymen res­pýblıkalyq deńgeıde «Qarttarǵa qurmet» aksııasy barysynda materıaldyq jáne moraldyq kómek berý sııaqty qaırymdylyq sharalary uıymdastyryldy. Elimiz boıynsha 2015 jyly jalpy sany 152 907 otbasyna qaıyrymdylyq kómek kórsetildi, dep habarlady QMDB-nyń bas­pa­sóz qyzmeti.