Prezıdent reformalary – damý kepili

Keshe Prezıdent janyndaǵy Ortalyq kommýnıkasııalar qyzmetinde Bilim jáne ǵylym mınıstrligi «Halyqaralyq baǵdarlamalar ortalyǵy» AQ prezıdenti Ǵanı Nyǵmetovtiń qatysýymen brıfıng ótti. Basqosýda Elbasynyń besinshi shaqyrylǵan Parlament Májilisin taratý jáne Parlament Májilisi depýtattarynyń kezekten tys saılaýyn ótkizý týraly Jarlyǵynyń mán-mańyzy sóz boldy. Birinshi kezekte Ǵanı Nyǵmetov depýtat­tardyń besinshi shaqyrylǵan Parlament Má­jilisin taratyp, Májilis pen barlyq deńgeıdegi máslıhattar depýtattarynyń saılaýlaryn ótkizý týraly bastamasyna Elbasynyń qoldaý bildirgeni memleketimizdiń ornyqty damýy­na jol ashatynyn atap ótti. «Men buǵan deıin parlamenttik jáne barlyq deńgeıdegi máslıhattar depýtattarynyń saılaýlaryn kezekten tys ótkizý jónindegi depýtattardyń úndeýin qoldap, óz pikirimdi bildirgen bola­tyn­myn. Sol ýaqyttan beri Prezıdent Nursultan Nazarbaev atalǵan máselege qatysty óz Jarly­ǵyna qol qoıdy. Shyn máninde, bul el ıgiligi úshin jasalǵan ońdy sheshim boldy. Sebebi, qazirgi tańda, Elbasy aıtqandaı, qıyn kezeńde, daǵdarys kezinde bizdiń halqymyz birlese otyryp, saılaýdy bir jylǵa sozbaı ótkizip, odan keıin daǵdarysty eńserýge baǵyttalǵan Prezıdent usynǵan reformalardy júzege asyrýymyz qajet», – dedi Ǵ.Nyǵmetov. Onyń sózine qaraǵanda, munaı baǵasynyń kóterilgenin kútpeı, ındýstrııalandyrýǵa, shaǵyn jáne orta kásipkerlik salalaryn damytýǵa kúsh salý kerek. «Qazirgi ýaqytta aldymyzǵa qoıylǵan maqsat-mindetterdi, sonyń ishinde Prezıdentimizdiń bes reformasy men «100 naqty qadam» Ult Jospary aıasynda kózdelip otyrǵan sharalardy yntymaqtasa otyryp júzege asyrý mańyzdy. «100 naqty qadamda» búgingi syn-qaterlerge jaýap bar. Onyń ústine, «Nurly Jol» baǵdarlamasyn júzege asyrý, túrli ınfraqurylymdyq jobalardy iske asy­rý, ekonomıkany ındýstrııalandyrýdyń keń aýqymdy baǵdarlamasyn oryndaý, shaǵyn jáne orta bıznesti damytý mindetteri naqty kórsetilgen», – dedi ol. Sondaı-aq, spıker Májilis pen barlyq deńgeıdegi máslıhattar depýtattarynyń saılaýlaryn birge ótkizý bıýdjet qarjysyn únemdeýge múmkindik beretinin jetkizdi. «Biz Elbasynyń kezekten tys saılaý ótkizý týraly Jarlyǵy arqyly bul elektoraldy naýqanda 5 mlrd. teńgege jýyq bıýdjet qarajatyn únemdeı alamyz. Sonymen birge, elektoraldy jyldy únemdeı alamyz. Biz konstıtýsııalyq jáne azamattyq quqyqtarymyzdy paıdalana otyryp, saılaýǵa qatysyp jatqan saıası partııalarǵa daýys berýge belsendi qatysýymyz kerek dep esepteımin», – dep túıindedi sózin Ǵ.Nyǵmetov. Joldybaı BAZAR, «Egemen Qazaqstan».