Bolıvııada mýzykanttar mingen avtobýs apatqa ushyrady

ASTANA. 26 qańtar. Bolıvııanyń astanasy La-Pas qalasyna taıaý mańdaǵy Iýngas aımaǵynda Perý memleketiniń «Elegansııa» orkestr toby mingen avtobýs jardan qulap, 9 adam qaza tapty. Bul týraly TASS aqparat agenttigine silteme jasaǵan egemen.kz tilshisi habarlady. Polısııa qyzmetkerleriniń aıtýynsha, 100 metr bıiktikten qulaǵan avtobýs ishinde 13 mýzykant bolǵan. Olardyń tórteýi aýyr jaraqat alyp, La-Pas qalasyndaǵy aýrýhanalardyń birine jatqyzyldy. Qutqarýshylar toby qaza tapqandardyń denesin izdeýge kiristi. Apattyń sebebi ázirge belgisiz. Mamandar kólik júrgizýshisi jol erejesin saqtamaı, joǵary jyldamdyqpen júrgen. Arnaıy qoıylǵan tosqaýyldy soǵyp ótip, bıik jardan qulaǵan degen boljam jasady. Aımaq turǵyndary atalǵan jerde jol apattary jıi bolatyndyqtan «ólim joly» degen ataý bergen. Aıta keteıik, Bolıvııada jylyna ortasha kórsetkish boıynsha, 1 myńǵa jýyq adam jol-kólik oqıǵasynan mert bolsa, 40 myńnan astamy túrli jaraqat alady. Aıan Ábdýálı. Derek: TASS. Sýret: ria.ru.