Belgııada bosqyndarǵa basseınge kelýge tyıym salyndy

ASTANA. 26 qańtar. Belgııanyń Kokseıde qalasynyń meri Mark Vanden Býshshe aldaǵy bir aıda bosqyn er adamdarǵa qoǵamdyq basseınderge kelýge tyıym saldy. Oǵan kelýshi áıelderdiń shaǵymy sebep bolyp otyr. Bul týraly lenta.ru aqparat portalyna silteme jasaǵan egemen.kz tilshisi habarlady. Shahar basshysynyń aıtýynsha, jergilikti qyz-kelinshekter shomylý kezinde bosqyn erlerdiń ózderine suqtana qaraıtynyn jetkizip, shaǵymdanǵan. Tipti, keıbir bosqyndar áıelder sýda júzip júrgen kezde sol kórinistiń aıasynda selfıge túsedi eken. «Mundaı keleńsizdikter kún saıyn artyp keledi. Buryn-sońdy bizde osyndaı shaǵymdar bolǵan emes. Bastapqyda eshqandaı shara qoldanǵan joqpyz. Alaıda, Iraktan shyqqan bosqynnyń basseınnen shyǵyp kele jatqan 11 jasar qyzǵa tap berýi kópshiliktiń jaǵasyn ustatty. Dál osy oqıǵadan keıin áreket etýge májbúr boldyq. Bosqyndarǵa ózimizdiń ómir súrý qaǵıdalarymyzdy úıretetin kez keldi», – degen Vanden Býshshe bul tyıymnyń áıel bosqyndar men balalarǵa qatysy joq ekenin aıtty. Degenmen, merdiń bul sheshimi Brıýssel tarapynan synǵa ushyrady. Belgııanyń Bosqyndar máselesi jónindegi memlekettik hatshysy Teo Franken bir adamnyń áreketi úshin barlyq bosqyndy jazalaýǵa bolmaıtynyn málimdedi. Aıta keteıik, Eýropada bosqyndar máselesi Germanııanyń Keln qalasynda jańa jyl aldynda bolǵan oqıǵadan keıin qaıta ýshyǵyp ketti. Atap aıtqanda, Kelnde Afrıka jáne arab elderinen shyqqan myńdaǵan bosqyn er adamdar áıelder men qyzdarǵa tap berip, olardyń sómkeleri men telefondaryn tartyp alǵan. Tipti keıbiri zorlyq-zombylyq áreketterge de jol bergen. Osyǵan baılanysty Keln polısııasy 766 qylmystyq is qozǵady. Onyń ishinde zorlyqqa qatystylary da bar ekenin atap ótken jón. Elaman Qońyr. Derek: lenta.ru. Sýret: spmi.ru.