Pleı-off joldamasy qoldan sýsyp barady

Burnaǵy kúni Qurlyqtyq hokkeı lıgasy sheńberinde Astananyń «Barysy» Chelıabiniń «Traktoryn» qabyldady. Saıystyń pleı-off satysyna joldama alý úshin baryn salǵan astanalyqtar oıyn sońyndaǵy býllıtten 5:4 esebimen jeńiske jetti. Atalǵan match lıganyń turaqty chempıonaty barysynda «Barystyń» bıylǵy maýsymdaǵy óz aıdynynda ótkizgen sońǵy kezdesýi ekenin atap ótken jón. Oıyn aıdyn ıeleriniń shabýylymen bastaldy. Nátıjesinde 4-mınýtta oıynshy basymdyǵyn júzege asyrǵan astanalyqtar Naıdjel Doýstyń kómegimen esep ashty. Al 13-mınýtta bizdiń komanda sapynan Roman Starchenko tóreshi belgilegen býllıtti sátti oryndap, esepti eseledi. Arada tórt mınýt ótkende, «Traktor» oıynshy basymdyǵyn paıdalanyp, bir shaıbanyń qarymtasyn qaıtardy. Onda Andreı Popov mergendigimen kózge tústi. Degenmen, 19-mınýtta Roman Savchenko taǵy da «Ba­rysty» eki shaıba aıyrmasymen alǵa shyǵardy. Ekinshi kezeńniń alǵashqy úsh mınýty elordalyqtar úshin naǵyz syn saǵaty boldy. Kezeń bastala salysymen alǵa umtylǵan reseılikter aınaldyrǵan 52 sekýndtyń ishinde bizdiń qaqpaǵa úsh shaıba engizip úlgerdi. Aldymen, 23-mınýt bastalǵan tusta taǵy da bir oıynshysy artyq bolǵan «Traktor» hokkeıshileri Anton Glınkınniń nátıjeli soqqysymen ekinshi shaıbalaryn soqty. Sosyn 20 sekýnd ótkende, Martın Rý­jıchka tarazy basyn teńestirdi. Osy goldan keıin «Barystyń» bas jattyqtyrýshysy Andreı Nazarov qaqpashy Iаn Lasonyń ornyna Pavel Polýektovti shyǵardy. Áıtkenmen, Pasha da aıdynǵa aıaǵy tıgen boıda qaqpadan shaıba alyp shyǵýǵa májbúr boldy. Iаǵnı, Rýjıchkanyń golynan keıin 32 sekýnd ýaqyt ótkende, Maksım Iаkýsenıa esepti «Traktordyń» paıdasyna 4:3-ke jetkizip, komandasyn alǵa shyǵardy. Úziliske deıin osy esep saqtaldy. Sońǵy bólikte «Barys» oıynshylary saýatty qımyldady. Nátıjesinde 51-mınýtta Dastın Boıd qarsylastar qaqpasyn dál kózdep, esepti teńestirdi. Kezdesýdiń negizgi ýaqytynda tablodaǵy kórsetkish ózgergen joq. Bul komandalardy overtaımǵa alyp bardy. Bul ýaqytta da birin biri ala almaǵan olar oıyn sońyndaǵy býllıtke júgindi. Al atalǵan synda astanalyqtardyń joly bolyp, «Barys» mańyzdy jeńiske qol jetkizdi. Búginde bizdiń komanda 80 upaımen Shyǵys konferensııasynda 7-orynda keledi. Al 8-orynda turǵan «Avtomobılıste» 79 upaı bolsa, 9-satydaǵy «Neftehımıktiń» qorjynynda 78 upaı bar. Bul eki komandanyń bizden bir oıyny kem ekenin de eskergenimiz jón. Odan bólek, osy matchtyń aldynda «Barys» óz aıdynynda «Avangardtan» – 2:7, al pleı-off joldamasyna talasta basty básekelesi «Neftehımıkten» 1:2 esebimen jeńildi. Sondyqtan elordalyqtarǵa lıganyń turaqty chempıonaty sheńberindegi qalǵan bes kezdesýde aıtarlyqtaı ter tógýge týra keledi. Nazar aýda­rarlyǵy, bul bes oıyn da syrt alańdarda oınalady. Aıta keteıik, «Barys» kelesi kezdesýin 1 aqpanda Ýfada jer­gilikti «Salavat Iýlaevpen» ótkizedi. Elaman QOŃYR, «Egemen Qazaqstan».