Kórme

erkin eldiń kemel tulǵalaryn tanystyrady О́skemendegi A.Pýshkın atyn­daǵy oblystyq kitaphanada «Erkin eldiń kemel tulǵalary» atty biregeı kórme ashyldy. Qazaqstan Táýelsizdiginiń 25 jyldyq mereıtoıyna arnalǵan aýqymdy sharaǵa jas memlekettik qyzmetshiler, Q.Nur­ǵalıev atyndaǵy kolledj stýdentteri men №4 orta mekteptiń joǵary synyp oqýshylary qa­tysty. Kórme tusaýkeserinde elimizdiń ult bolyp qalyptasý, memleket retinde damý syndy tarıhı úderisterinde orasan orny bar tulǵalardyń tutas galereıa­sy tanystyryldy. Olardyń ǵıbratty ǵumyry men memlekettik mańyzy bar eńbekterinen syr shertetin kitaptar men ǵylymı jınaqtar, sondaı-aq jergilikti qylqalam sheberleriniń qolynan shyqqan portretteri jurtshylyq nazaryna usynyldy. Atap aıt­qanda, kórmeden Abylaı hannan Nursultan Nazarbaevqa deıingi saıası tulǵalar, Qarakereı Qa­ban­baıdan general Panfılov pen Baýyrjan Momyshulyna deıingi batyrlar, Shoqan Ýálı­hanovtan Qanysh Sátbaevqa deıingi ǵalymdar, Abaıdan Ol­­jas Súleımenovke deıingi aqyn­­dar, Dına Nurpeıisovadan Bı­bigúl Tólegenovaǵa deıingi qa­zaqtyń áıgili áıelderi, kúsh atasy Qajymuqannan Olımpıada chempıondaryna deıingi dańqty sportshylar sııaqty tulǵalar týraly tolyq málimet alýǵa bolady. Tusaýkeserde kitaphana qyz­metkerleri Táýelsizdik tarı­­hyndaǵy tulǵalar týraly tolǵamdyq dáristerimen birge qa­tysýshylar arasynda túrli vık­to­rınalyq oıyndar men saýaldar uıymdastyryp, qyzyqty de­­rekterge keneltti. Sonymen bir­­ge, О́skemen Teńge saraıynyń me­­reıtoılyq monetalary da táý­el­­­siz tarıhymyzdyń ataýly kún­derin aıshyqtaı tústi. Atalǵan kór­me jyl boıy qyzmet kórsetip qana qoımaı, óńir mektepteri men mekemelerinde kóshpeli kórmeler ótkizbek. Uıymdastyrýshylardyń aı­týynsha, Táýelsizdigimizdiń tamyrly tarıhymen jetik tanys bo­lý azamattardyń otanshyldyq se­zimin odan ári jandandyra túsedi. – Tarıh – áleýmettik-ekono­mıkalyq formasııa, ataýly kúnder men oqıǵalar ǵana emes, uly isterdi keshegi jáne búgingi tańda iske asyryp otyrǵan naqtyly adamdardyń, bıleýshiler men qolbasshylardyń ómiri. Kórmege qoıylǵan kitaptardyń kópshiligi Qazaqstan Táýelsizdiginiń alǵashqy jyldary Elbasynyń bastamasymen «Mádenı mura» memlekettik baǵdarlamasyn júzege asyrý nátıjesinde shyǵarylǵan. «Ta­rıhty uly adamdar jasaıdy» desek, ǵasyrlar kýásine aınalǵan elimizdiń tarıhy aıtýly tulǵalar ǵumyrnamasymen tyǵyz baılanys­ty. Osy kitap kórmesi jastarǵa el tarıhy týraly bilimderin júıelep, keleshek urpaqtyń memleket tarıhyna qosar úlesin baıyp­tap oılanýyna jáne óziniń ómirlik jolyn tańdaýyna kómek beredi dep senemiz, – dedi kitaphana dırektory Habıba Aqjigitova. Dýman ANASh, «Egemen Qazaqstan». О́SKEMEN.