Atqarylǵan ister aýqymdy

Keshe Mádenıet jáne sport mınıstrliginde keńeıtilgen alqa otyrysy ótti. Premer-Mınıstrdiń orynbasary Darıǵa Nazarbaeva, mınıstrlik basshylyǵy, komıtetter tóraǵalary men departamentter dırektorlary, BAQ ókilderi qatysqan jıynda memlekettik organnyń 2015 jylǵy jumysynyń nátıjeleri jáne 2016 jylǵa qoıylǵan mindetter talqylandy. Otyrysty asha otyryp, mınıstr Arystanbek Muhamedıuly «100 naqty qadam» Ult Jospary má­denıet jáne sport salasyn­da strategııalyq damýdyń magıs­tral­dyq joldaryn anyqtaǵandyǵyn aıtyp ótti. «Instıtýttyq reformalardy iske asyrý sheńberinde «Birtektilik jáne biregeılik» baǵyty boıynsha halyqaralyq tájirıbeni jáne EYDU memleketteriniń standart­taryn negizge ala otyryp, 19 nor­ma­tıvtik-quqyqtyq aktilerdi ázir­leý boıynsha aýqymdy jumys júr­gi­zildi, sonyń ishinde 18-i qazir­gi tańda bekitildi», dedi A.Muha­me­dıuly. Sonymen qatar, mınıstrlik EKSPO-2017 halyqaralyq kór­mesin ótkizý barysynda uıym­dastyrylatyn mádenı shara­lardyń keshendi baǵdarlamasyn ja­sap bolǵanyn da tilge tıek etti. Vedomstvo opera jáne balet óne­rinde, ǵylymı mekemeler, ýnıversıtetter, muraǵat jáne kitaphanalar arasyndaǵy halyqaralyq yntymaqtastyq máselelerine de basa nazar aýdaryp, ótken jylǵy jetistikterine de soqpaı ótpedi. Dálirek aıtsaq, ıtalııalyq taraptyń shaqyrtýy boıynsha «Astana Opera» teatrynyń balet trýppasy Eýropanyń eń iri teatrlarynyń biri bolyp sanalatyn «Karlo Felıche» teatrynda óner kórsetkeni, norvegııalyq jáne nemis ǵalymdary Berel qorǵany, «Tamǵaly» jartasynyń petroglıfteri sekildi arheologııalyq eskertkishterdi zertteý jobalaryna óz qyzyǵýshylyqtaryn bildirýi biz úshin úlken jetistik. Alqa otyrysynyń alǵashqy bóliminde jıynǵa qatysýshylar Qazaq kınematografııa salasyn damytý jáne nasıhattaý isinde belsendi jumys júrgizilip jatqanyn da nazardan tys qaldyrmady. Ult Jospary aıasynda 2015-2020 jyldarǵa arnalǵan birqatar kıno jáne telejobalardy jasaýdyń birneshe jospary bekitildi. Bul jospar elimizdiń baı murasyn, qazirgi zaman shyndyǵynyń úzdik úlgilerin, taǵylymdy tarıhı oqıǵalary men kórnekti tulǵalardy kıno arqyly nasıhattaýǵa múmkindik beretinin alǵa tartty. Sonymen birge, bes ınstıtýttyq reformanyń tórtinshi baǵytyn júzege asyrý maqsatynda mınıstrlik Qazaqstan Respýblıkasynda deneshynyqtyrý jáne sportty damytýdyń 2025 jylǵa deıingi tujyrymdamasyn jasap bolǵanyn atap ótti. Onyń negizgi maqsaty – eldiń sporttyq ómirin belsendi etý bolyp tabylady. Jobanyń jańashyldyǵy – aımaqtyq sporttyq qaýymdastyqtardy qoldap, sportty ekonomıka salasynyń bóligi retinde damytý bolyp tabylady. Basqosý barysynda 2016 jylǵy Rıo-de-Janeırodaǵy (Brazılııa) HHHI jazǵy Olımpııa oıyndaryna el sportshylarynyń qanshalyqty daıyn ekendikteri de qozǵaldy. Búgingi tańda ulttyq quramamyz tórtjyldyqtyń basty jarysyna qatysý úshin 11 sport túrinen 45 joldamaǵa qol jetkizgenin maqtanyshpen aıtamyz. Sondaı-aq, mınıstrlik qyzmetiniń basty baǵyttaryna tilderdi damytý jáne eldiń qoǵamdyq saıası ómirindegi jumystar jatatyny belgili. Atalmysh sala aıasynda «Qazaqstan halqy Assambleıasy týraly» Zań jáne «Qazaqstan halqy Assambleıasynyń damý tujyrymdamasy» qabyldanyp, azamattyq qoǵam ınstıtýttarynyń rólin ilgeriletý men úkimettik emes uıymdar arasyndaǵy jumysta halyqaralyq tájirıbe engizý maqsatynda «ÚEU qyzmeti máseleleri boıynsha keıbir zańnamalyq aktilerge ózgertýler men tolyqtyrýlar engizý týraly» Zań bekitilgeni de qamtyldy. Otyrys sońynda vedomstvonyń 2016 jylǵy jumys baǵyttary anyqtalyp, mınıstrliktiń qurylymdyq bólimsheleri jáne vedomstvolyq baǵynysty uıymdarynyń basshylaryna Premer-Mınıstrdiń orynbasary Darıǵa Nazarbaeva birqatar naqty tapsyrmalar berdi. Raýan QAIDAR, «Egemen Qazaqstan».