Aýyldaǵy Allanyń úıi

aldaǵy jazda paıdalanýǵa berilmek Tekes aýylynda osydan on­shaqty jyl buryn boı kótergen meshit úıiniń qurylysy qarajat tapshylyǵynan jarym jolda toqtap qalǵan edi. Ári ótken, beri ótkenniń kózine shyqqan súıeldeı múshkil hal keship turǵan sol qa­sıetti shańyraqtyń aınalasy ót­ken jazdan beri dúbirge tolyp, jóndeý jumystary qaı­ta jandana bas­tady. Árıne, ony qolǵa alyp otyrǵan baı da, baǵlan da, jaqsy da, jaısań da emes. Osy aýyldyń aýzynda Allasy, kó­kireginde ımany bar, bes ýa­qyt namazyn qaza qyl­maıtyn Nurlan Abyhanov, Ǵabıt Baısaqalov, Erǵanat Taý­baldıev, Almas Núsip­bekov, Maqsat Jan­peıi­sov sekildi qarapaıym ǵana jigitteri. Qasterli shańyraqtyń qamqor qoldyń qaıyryna zárý bolyp, músápir kúıge túsip turǵan kórinisi Allanyń aq jolynda júrmiz deıtin jigitterdiń jan-júregin jaı taptyrmasa kerek. О́zara aqyldasyp, saýapty iske muryndyq bolýǵa bel baılaıdy. Meshittiń ishi-syrtyn aralap kórip, endigi jumysyna jumsalatyn qarajat kólemin anyqtap alady. Sodan keıin aýyl jurtynyń basyn qosady. Oǵan aýyl basshylary men eldiń jaıy dese búıirleri búlkildeıtin aq­saqal-qarasaqaldardy da aralas­tyra, oılaryn ortaǵa salǵanda, barlyǵy da biraýyzdan qoldaý bildirgen-di. Jaratqannyń jaq­syly­ǵynan úmitti jamaǵat mun­daıda aıanyp qalsyn ba. Qýana quptady. Biri qoıyn, biri taıy­n, endi biri tana-torpaǵyn atap, qal­talysy aqshalaryn usynyp, ájeptáýir qarajattyń basy birik­ken. Jınalǵan maldy aqshaǵa, aqshany zatqa aınaldyra bilgen jigitter qurylysqa qajetti mate­rıal­dardy satyp alyp keldi de, saýapty iske kiristi de ketti. Nátıjesinde syrtynyń jaýyn men kúnge qaqtalyp mújilgen jerleri aqtalyp-sylanyp, qaıta qalpyna keltirildi. Tóbesiniń maıysqan belaǵashtary da aýys­tyrylyp, shatyry qańyltyrmen kómkerildi. Aspan tústes kúmbezi men azan shaqyratyn munarasy da kúnshilik jerden kóz tartatyn dárejege jetkizildi. Sol sııaqty Meshit ishindegi 200 adam bir mezgilde namazǵa turatyn, áıelder namaz oqıtyn, ımam ju­mys isteıtin bólmeler de din talabyna saı qalyp­qa túsip keledi. Jaqynda ǵana ornatylǵan jylý júıesi de jańashyldyǵymen erek­shelenedi. Maıdy da, kómir­di de qajetsinbeıtin jylý qa­zan­dyǵy elektr qýaty arqyly jumys is­teıdi. Jylý qazandyqqa qosylǵan tútiksheler arqyly eden astynan jiberilgen. Meshit ishi osylaısha qaqaǵan qysta da qurqyltaıdyń uıasyndaı qyz-qyz qaınap turmaq. Meshittiń jóndeý jumys­taryna eshkim syrttan maman izdep sabylǵan joq. Barlyq jumysty qurylystan habary bar aýyl jigitteri ózderi-aq tyndyrýda. Son­dyqtan da mun­daǵy ár mınýt, ár saǵat eseli eńbekke toly. Iá, Tekestegi jańa Meshittiń qury­lysy kún ótken saıyn qar­qyn alýda.  Jumabek TÁLIPULY. Almaty oblysy, Raıymbek aýdany.