Jaqsy bastama jalǵasyn tabýda

Qysqa merzimde qarqyndy damyp, elimizdiń mańdaıaldy bilim oshaǵyna aınalǵan L.N.Gýmılev atyndaǵy Eýrazııa ulttyq ýnıversıtetinde keıingi jyldary alty Alashqa úlgi bolarlyq jaqsy bir dástúr qalyptasyp kele jatqany kóńilge qýanysh uıalatady. Ol qandaı da bir memlekettik merekeni, ýnıversıtet ishindegi aıtýly datalardy nemese ujymǵa qatysty qýanyshty toılaýdyń zamanaýı jańa úlgisi – asqaq Astananyń rýhanı ortalyqtaryna shaqyryp, qýanyshty kópshilikpen bólisý arqyly kóbeıtip, rýhanı ósý arqyly shyn shattyqqa bólený dástúri. Bul bastamany alǵash kótergen bilim ordasynyń rektory Erlan Sydyqov ekenin kópshilik jaqsy biledi. Osyndaı shattyqqa toly sharanyń birin tórt jyl buryn atalmysh oqý ornynyń ujymy Qalıbek Qýanyshbaev atyndaǵy qazaq teatrynda atap ótken bolatyn. Sol qýanyshty keshke ortaqtasa kelgen oqytýshylar qaýymy «mynaý bir jaqsy bastama eken» dep shyn rızashylyqpen serpilip qalǵany áli esimizde. Osyndaı tanym men taǵylymy aı­ryqsha mádenı shara adamzat tabaldy­ryǵynan jańa attaǵan jyl basynda, naqty aıtsaq, 27 qańtarda Eýrazııa ult­tyq ýnıversıtetiniń ujymyn taǵy da bir serpiltti. Elimiz ústimizdegi jyldy Qazaqstan Respýblıkasy Táýelsizdiginiń shırek ǵasyrlyq mereıtoıynyń jyly dep shadyman kóńil kúımen atap ótýdi bastap ta ketti. Osynaý memlekettik már­tebeli mereke Táýelsizdiktiń tól týmasy L.N.Gýmılev atyndaǵy Eýrazııa ulttyq ýnıversıtetiniń 20 jyldyq mereıtoıymen tuspa-tus kelip, birligi men tirligi ja­ras­qan ujymnyń saltanatyn eseleı túsýde. Osy ıdeıa aıasynda atalmysh ýnıversıtet tórt jyl burynǵy dástúrin tórge shyǵardy. Bul joly «Astana Opera» teatryna baryp, «Abaı» qoıylymyn tamashalap, jan saraıyn ashar asqaq ónermen qaýyshyp, rýhanı oı oljalap qaıtty. Jaqsy bastama jalǵasyn tapty degen, mine, osy. Raýan QAIDAR, «Egemen Qazaqstan».