Aqtóbede alǵash ret baýyr aýystyrý otasy jasaldy

AQTО́BE. 1 aqpan. О́tken jyly kúzde Ulttyq medısına ortalyǵy janyndaǵy respýblıkalyq transplantologııa ortalyǵynyń basshysy, akademık, medısına ǵylymdarynyń doktory Jaqsylyq Dosqalıev oblystyq klınıkalyq aýrýhana bazasynda búırek aýystyrý operasııasyn jasap, BAQ ókilderimen bolǵan brıfıngte 2016 jyly munda baýyr aýystyrý otasy jasalatynyn aıtqan bolatyn. Mine, sol sát te jetti. Elimizdiń batys aımaǵynda alǵash ret Aqtóbede baýyr aýystyrý operasııasy jasaldy. Bul týraly egemen.kz tilshisi habarlady. Ońtústik Koreıanyń Seýl ulttyq ýnıversıtetinen kelgen Kvang Výng Lı jáne akademık Jaqsylyq Dosqalıev bastaǵan aqtóbelik bilikti hırýrgter 38 jastaǵy áıeldiń baýyryn aýystyrdy. Bul operasııa 7 saǵatqa sozyldy. Naýqastyń jaǵdaıy jaqsy. Bul týraly oblystyq aýrýhanada ótken baspasóz konferensııasynda habardar etildi. Baýyr aýystyrý buǵan deıin Astana, Almaty jáne Shymkent qalalarynda jasalyp kelgen eken. Stýdenter men dárigerler baýyr aýystyrý sátin májilis zalyndaǵy ekrannan kórdi. Derti dendegen áıel buǵan deıin dári-dármektiń kúshimen ómir keshken. Oǵan týǵan inisi baýyryn berýge keliskennen keıin Seýl ýnıversıtetiniń dárigerlerimen birlese otyryp, apaly-inili ekeýine medısınalyq tekserý júrgizilgen. Ońtústik Koreıadan kelgen professor Kvang Výng Lıdiń aıtýynsha, baýyry almastyrylǵan áıel áli de úsh aptadaı aýrýhanada jatady. Al týǵan ápkesine baýyrynyń 70 paıyzyn bergen jigit bári sátti bolsa,10 kúnnen soń úıine oralady. Dárigerlerdiń keńesterin múltiksiz oryndap, kútinip júrse, onyń aǵzasy aldaǵy 6 aıdyń ishinde tolyqtaı qalpyna keledi. Oblystyq densaýlyq saqtaý basqarmasynyń basshysy Áset Qalıevtiń málimdeýinshe, bolashaqta oblysta transplantologııalyq ortalyq ashylady dep kútilýde. Budan bylaı aqtóbelik dárigerler baýyr aýystyrý operasııasyn ózderi jasaıdy. Bıyl osyndaı 5 ota jasaý kózdelýde. Derek kózderinen málim bolǵanyndaı, jalpy oblysta 128 adam búırek , al, 60 adam baýyr aýystyrýdy kútýde eken. Satybaldy Sáýirbaı. Derek: egemen.kz. Sýret: Haıredın Raýshanov.