«Tiregimiz – Táýelsizdik, tilegimiz – Turaqtylyq, bilegimiz – Birlik»

Keshe Astanadaǵy Ulttyq akademııalyq kitaphanada Táýelsizdiktiń 25 jyldyǵyna arnalǵan osy taqyryptaǵy kitap kórmesi jáne «Aqyndar Táýelsizdikti jyrlaıdy» atty poezııalyq marafon ótti. Atalmysh kórmeniń negizgi maqsaty – Qazaqstannyń qazynaly tarıhyn, 25 jyl ishindegi ekonomıka, saıasat jáne áleýmettik saladaǵy jetistikterin, álemdik qaýymdastyqqa tanylǵan mem­leketimizdiń qaryshty, qarqyndy damý kezeńderin baıandaý. Kórmede bes ınstıtýttyq reformany júzege asyrý boıynsha «100 naqty qadam» – Ult Josparyn jáne 2015 jylǵy 30 qarashadaǵy Elbasy N.Á.Nazarbaevtyń Qazaqstan halqyna arnaǵan «Qazaqstan jańa jahandyq naqty ahýalda: ósim, reformalar, damý» atty Joldaýyn túsindirýge basa nazar aýdarylǵan. Qazaq memleketiniń san ǵasyrlyq damý tarıhyndaǵy ýaqyt pen urpaqtar sabaqtastyǵyn kórsetý, sondaı-aq, jastardyń patrıottyq sezimin oıatyp, oń ımıdjin qalyptastyrý sharapatty sharanyń negizgi mindeti retinde aıshyqtalǵan. Kórmeden bólek, jyrdan shashý shashqan aqyndardyń poe­zııalyq keshi de ótken tarı­hymyzdyń óshpes tustaryn baıan­daýǵa baǵyttaldy. Bodan­dyqtan bostandyqqa deıingi ǵumyrymyzdy ár aqyn álinshe jyrlady. Aqyn, halyqaralyq «Alash» syılyǵynyń ıegeri Serik Turǵynbekov táýelsizdik deı­tin tátti uǵymynyń máni men mańy­zyn tereń tebirenispen qozǵap, tyńdarmannyń oıyn tarıh kó­shine ilestirip áketkendeı kúıge bóledi. Odan soń búgingi jas­tar poezııasynyń jalyndy ókil­deri Erbol Beıilhan, Oljas Qasym, Erbol Alshynbaı óleń­derin órletti. Aıtýly keshtiń tizgi­nin aıtysker aqyn, «Daryn» mem­lekettik jastar syılyǵynyń laý­reaty Dáýletkereı Káp ustap, ádebıet álemindegi oıly oqıǵa­lardy ortaǵa saldy. Raýan QAIDAR, «Egemen Qazaqstan».