Konsepsonnyń Qazaqstanǵa sálemi

Biz san jyldar boıy Aq úıdiń sımvolyna aınalyp ketken Konsepson Pıchchıottomen 2010 jyldyń sáýirinde kezdes­ken edik. «Kezdesken» degeni­miz de artyqtaý, durysy aty ańyz­ǵa aınalǵan ájeıdiń ózi­niń úırenshikti turaqty ornynan ózimiz tapjylmaı baryp, taýyp alǵanbyz. Myna sáı­kes­tikti qarańyz, dál sol tusta Va­shıngtonda ıadrolyq qaýipsizdik jó­ninde kezekti ǵalamdyq sammıt ótip jatqan bolatyn. Jahandyq jıynda álemniń ár qıyrynan 47 eldiń prezıdenti men halyqaralyq uıymdardyń basshylary bas qosty. Qazaq eliniń Prezıdenti Nursultan Nazarbaev bastaǵan delegasııa quramynda biz de bar edik. Álemdik saıasattyń eki tizgin, bir shylbyryn ustaǵan Aq úıdiń qarsy aldynda baıaǵydaı qas­qaıyp tur edi kempir. Jaqyndap kelip, jón surastym. Sosyn qarııany yńǵaıyma tartyp, shúıir­kelesýdi oıladym. Sonyń alǵy sózinde ózimniń ıadrolyq qarýdan óz erkimen sanaly túr­de bas tartqan elden kelip otyr­ǵanymdy baıan ettim. Kásibı amalym aldamapty, ony estigen boıda ájeıdiń júzi jylyp sala berdi. Bir rıza bolǵanym, atomdy zalalyn tárk etken Qazaq­stan týraly, onyń Memleket bas­shysy Nursultan Nazarbaev jaıynda Konsepsonnyń biraz maǵlumattary bar eken. Qolym­daǵy «Washington post» gazetiniń sý jańa sanyndaǵy Elbasymyzdyń beınesin kórgeni sol edi: «Men ony bilemin», – dep kishkentaı ju­­dyryǵynan bas barmaǵyn shy­ǵardy, jaqynyn kórgendeı jymıdy. Seksen jasqa qaraı aıań­daǵan qarttyń jadynyń myq­tylyǵyna tánti bolǵanmyn sonda. Osynaý 35 jylda ájeı Aq úı­diń qarsy betinde tu­ryp, bes prezıdenttiń zama­nyn kóripti. «Reıgannan bastap, eki Djordj Býshtyń úl­­keni men kishisin, soń­­ǵysy Barak Oba­manyń pre­zıdenttik merzimin kórdim. Olar­dyń bireýimen de kezdes­pesem de, álemniń ár tusynan Va­shıngtonǵa qydyrystap kelgen túrli ult pen ulystarmen kez­destim, pikirlestim, sýretke tús­tim. Bárine ómirdiń bas­ty qun­dylyǵy – beıbitshilik ekenin uǵyndyrdym. Álem hal­qy qaqtyǵyssyz, qantógissiz, urys­syz, talassyz ǵumyr keshkennen asyly joq. Meni qanshalyqty túsingenin bilmeımin. Biraq men ózimdi mıssııamdy oryndaǵandaı sezinemin. Sony qazaq jurtyna aıta bar. Qazaqstannyń ıadrolyq qarýdan bas tartqan beıbitsúıgish Prezıdenti muny áý bastan-aq túsinipti. Iá, ol kóregen adam», – dedi Konsepson qoshtasarda. Men Konsepsonnyń qazaq eline amanattaǵan izgi sálemin jet­kizdim. Ras, ol AQSh prezıdent­terin kórgen joq. Biraq aqparat quraldary, ınternet betteri ar­qyly kúni keshe ǵana ómirden ótken keıýananyń beıbitsúıer úndeýleri álemniń ár tarabyna tarap jatty. Qanat ÁÝESBAI. ASTANA – VAShINGTON –ASTANA.