Jaýyngerlik tehnıkanyń zamanaýı úlgileri

Qazaqstannyń ınjenerlik áskerler bólimsheleri men qury­lymdaryna óte jaýapty min­det júktelgen. Olar Qurlyq ásker­leriniń bólimsheleri men jalpy áskerı bólimderine jaýyngerlik is-qımyl júrgizý úshin qolaıly jaǵdaılar jasaıdy. «Injenerlik áskerler beıbit ýaqytta da ózine mindettelgen san alýan tapsyrmalar keshenin iske asyrady. Máselen, evakýasııa­laý aıla-tásilderin, shabýylda áskerlerdiń jyljýyn qamtamasyz etedi, joldar salady, sýly tos­qaýyldan ótýdi jabdyqtaıdy, qar­­sylastardyń bógetterine ót­­kelder jasaıdy, qozǵalys joldaryn ınjenerlik barlaý, basqarý bólimderin qurýdy júzege asyrady. Sonymen qatar, sýdy óńdeý men tazartý arqyly áskerdi qajetti sý qorymen qamtamasyz etedi», – dep atap ótti QR QK QÁ BB ınjenerlik áskerler bastyǵy polkovnık Nurlan Shaımahov. Sondaı-aq, elimizdiń barlyq aımaǵynda ınjenerler jarylǵysh zattardy tabý, anyqtaý jáne joıýdy qamtamasyz etedi. Búginde ınjenerlik áskerler ınjenerlik jaraqtandyrý qural­darymen jáne qajetti tehnıkamen jabdyqtalǵan. Alda sapaly qaıta jabdyqtaý júrgiziledi dep kútilýde. «2017-2018 jyldary Qurlyq áskerlerine qaraıtyn áskerlerdi zamanaýı quraldarmen jáne tehnıkalarmen qaıta jab­dyqtaý josparlanǵan. Bul jer qa­zatyn ınjenerlik tehnıka, mına jarǵysh shepter ornatý men barlaý júrgizý tehnıkasy, for­tıfıkasııalyq jabdyqtar, qorǵanys shepteri, sýdy anyqtaý jáne tazartýdy qamtamasyz etý quraldary», – deıdi polkovnık Nurlan Shaımahov. Qazirgi ýaqytta Qazaqstannyń Qurlyq áskerleriniń quramynda saperlik brıgadalar, jeke bó­lim­sheler, sondaı-aq, jalpy áskerı brıgadaǵa qarasty ınjenerlik bólimsheler bar. Onyń ishine 68665 áskerı bóliminiń ınjenerlik-saperlik rotasy kiredi. Basqa da ın­jenerlik bólimsheler sııaqty atalǵan rota da QR QK iri jaýyngerlik jattyǵýlaryna qatysady. Injenerler, qyzmetshiler mun­da óz sheberlikterin shyńdap, teo­rııalyq jáne tájirıbelik bilik­tilikterin nyǵaıtady. Áskerı mamandardyń quramy Qurlyq áskerleri Áskerı ınstı­týtynyń jáne joǵary oqý oryn­darynyń áskerı kafedralarynyń túlek­terimen, 10228 áskerı bólimi kishi mamandarymen tolyǵyp otyrady.   «Egemen-aqparat».