Hantáńirden Ulytaýǵa deıin

«Poezııa! Menimen egiz be ediń? Sen meni sezesiń be, nege izdedim? Alaýyrtqan tańdardan seni izdedim, Qaraýytqan taýlardan seni izdedim», – dep jyrlaǵan Muqaǵalı aqyn shyndyǵynda da poezııa­men egiz tulǵa. Ol dúnıege shyr etip emes, jyr etip kelgen sııaqty. О́leńderi tilge jeńil, júrekke jyly tıedi. Qazaq poezııasynyń qazanaty sekildi shapqan saıyn shabyttana túsetin Maqataev jyrlary oqyrman oıyn dóp basyp, júreginiń tórinen oryn alǵany qashan. Keshe aqynnyń 85 jasqa tolýyna oraı Ulttyq akademııalyq kitaphananyń uıymdastyrýymen ótken jyrǵa toly, syrǵa toly keshtiń kýási boldyq. Memlekettik syılyqtyń laýreaty, M.Maqataev atyn­daǵy syılyqtyń alǵashqy ıegeri, aqyn Nesipbek Aıtuly júrgizgen jıynnyń ózine tán ereksheligi boldy desek, artyq aıtqandyq bolmas. Nege deseńiz, bul keshte aqyn Júrsin Ermannyń da shyǵarmashylyǵy keńinen nasıhattaldy. Solaı bolýy zańdy da shyǵar. Sebebi, M.Maqataev atyndaǵy syılyqtyń eki márte ıegeri bolǵan Júrsin Ermannyń óleń ómirinde Muqaǵalıdyń alar orny erekshe ekeni estelikterinen bilinip turdy. Atalǵan keshke Jýrnalıstıka máselelerin zertteý ınstıtýtynyń dırektory, professor Namazaly Omashev, «Egemen Qazaqstan» respýblıkalyq ga­zeti» AQ prezıdenti Saýytbek Abdrahmanov, rejıs­ser, professor Sáýlebek Asylhan qatysyp, oı sandy­ǵynan syr sýyryp, qundy derektermen qulaq qury­shyn qandyrdy. Sonymen qatar, kitaphana hollyndaǵy kórmede «Qudiretti jyrdyń qundaǵy» taqyryby boıynsha Muqaǵalı Maqataevtyń shyǵarmashylyǵy boıynsha jaryq kórgen kitaphana qoryndaǵy kitaptar jáne aqyn óleńderiniń jelisi negizinde talantty sýretshi Almas Syrǵabaevtyń qalamynan týǵan sýretter kórermen nazaryna usynyldy. Raýan QAIDAR, «Egemen Qazaqstan».  Astana.