Birlese atqarǵan is jeńil

«Astana EKSPO-2017» UK» AQ-tyń jańa keńse ǵımaratynda Astana qalasy ákimdigimen birlesken jınalys bolyp ótti. Kún tártibi boıynsha «Astana EKSPO-2017» halyqaralyq kórmesin uıymdastyrýdyń daıyndyq máseleleri qaraldy. «О́tken jyldyń kúzinde biz Bir­lesken is-sharalar josparyna qol qoıǵan bolatynbyz. Sonyń negizinde ınjenerlik júıe, jol qurylysy, transporttyq ınfraqurylym, qala­daǵy qoǵamdyq kólik, týrızmniń damýy, taǵy da basqa kóptegen máseleler boıynsha mindetter belgilengen bolatyn», – dedi ulttyq kompanııa basshysy A.Esimov. Birlesken is-qımyl jospary aıasynda taraptar 2017 jyly ótetin kórmege daıyndyq jáne ony ótkizý boıynsha ózekti máselelerdi jumys babynda talqylap, sheship otyrady. Odan ári óz sózinde A.Esimov ulttyq kompanııa atqarǵan negizgi jumystar­ǵa toqtalyp, is-sharalardyń kestege sáı­kes júrgizilip jatqanyn, barlyq baǵyttar boıynsha jumystardyń kú­sheıtilgenin jáne Memleket basshysy bergen tapsyrmalardyń bári oryndalyp jatqanyn atap ótti. Búgingi tańda 74 memleket pen 14 halyqaralyq uıym EKSPO-2017 kórmesine qatysatyndaryn resmı túrde rastady. Sonymen birge, «Astana EKSPO-2017» UK» AQ bas­qar­ma tór­­aǵasy kórmeniń ashylýy kezinde qatysýshy memleketterdiń sany 100-ge jetetinine nyq senim bildirdi. Kelesi kezekte Astana qalasy ákimi­­niń orynbasary Nuráli Álıev qalany atalmysh mańyzdy sharaǵa daıyndaý jóninde tolyǵyraq aıtyp berdi. Onyń aıtýynsha, EKSPO ótken kezde basty salmaq kólik basqarý júıesine túsedi. Astana ákimdigi kór­me­ge daıyndyq aıasynda qalanyń kólik-logıstıkalyq ınfraqurylymyn qamtamasyz etý boıynsha úlken jumys atqarýda. Atap aıtqanda, biryńǵaı dıspetcherlik qyzmet pen kóliktik baqylaý qyzmeti quryldy, Qazaqstanda alǵash ret Kólik aǵynyn basqarý orta­lyǵy engizilip, naqty qyzmet atqaryp jatyr. Turaq keńistigin basqarý júıesin keshendi júrgizý máselesi qaralýda ıntellektýaldy kólik júıesin (ITS) engizý jumystary qolǵa alyndy. Nuráli Álıevtiń sózine qaraǵanda, osy máseleni keshendi túrde sheshý elordanyń kólik-logıstıkalyq je­lisin halyqaralyq standarttarǵa sáı­kes qurýǵa múmkindik beredi. Qa­la ákiminiń orynbasary óz sózinde quqyqtyq tártipti qamtamasyz etý, densaýlyq saqtaý, kórme qonaqtaryn ornalastyrý men tamaqtandyrýdy uıymdastyrý, is-sharalar kúntizbesi, volonterlar jumysyn uıymdastyrý jáne basqa mańyzdy sharalardy atap kórsetti. Qala ákimdigi qyzmet kórsetý sala­­synda sapany arttyrý boıynsha jumystarǵa aıryqsha basymdyq berip keledi. Búgingi tańda ulttyq kompanııa­men birlesken «EKSPO usy­nady» atty Astana qalasynyń seriktestik baǵdarlamasy júzege asyrylýda. «Qazirgi kezde seriktestik baǵdarlamaǵa qatysýǵa 50-den astam ótinim kelip tústi», – dedi N.Álıev. Onyń aıtýynsha, baǵdarlamaǵa qonaqúıler, qoǵamdyq tamaqtaný obektileri, kólik qyzmetterin usynatyn kompanııalar men týrfırmalar qatysady. Keńes barysynda elorda ákimi birlesip jumys isteýdiń jáne barlyq baǵyttar boıynsha ózara áreket etýdiń mańyzdylyǵyn atap ótti. «Qala úshin EKSPO halyqaralyq kórmesi mańyzdy emtıhan bolyp tabylady, onyń ústine bul elordamyzdyń tynys-tirshiliginiń barlyq salasynyń damýyna qosymsha serpin beredi. Kórmege de, Astanaǵa da qyzyǵýshylyqtyń udaıy artyp otyrǵany baıqalady. Búgin­de barlyq qalalyq qurylymdar­dyń basty mindeti – qalany EKSPO-2017 kórmesine daıyndaý» – dedi sózi­niń qory­tyndysynda Ádilbek Jaqsy­bekov. «Astanada kóptegen mańyzdy ha­lyqaralyq sharalar ótkizildi, biraq olar 2-3 kúnge ǵana jalǵasatyn. EKSPO kórmesi 93 kún boıy óte­di jáne bul qalanyń barlyq ınfra­qurylymyna salmaq túsirmek, bári­miz de buǵan daıyn bolýymyz kerek», – dedi otyrys qorytyndysynda Ahmetjan Esimov. Jylqybaı JAǴYPARULY, «Egemen Qazaqstan». Astana.