Aýylda kúrmeýli másele joq emes

«Aýyl» halyqtyq-demokratııalyq patrıottyq partııasy Ońtústik Qazaqstan oblystyq fılıalynyń tóraǵasy Qanatbek Dosalıev oblystyq máslıhat depýtattyǵyna úmitker retinde №46 saılaý ýchaskesine tirkeldi. Qaratóbe eldi mekeni, M.Áýezov atyndaǵy №96 orta mektepte ornalasqan №46 saılaý komıssııasynyń tóraǵasy Orazáli Mahanov úmitkerdiń qujattaryn tirkeýge komıssııa músheleriniń qatysýymen qabyldap aldy. «Siz – osy saılaý komıssııa­syna alǵash bolyp tirkelgen úmitkersiz. Saılaýda jeńiske jetip, eldiń úmitin aqtaı berýińizge tilektespin», – degen aq tilek aıtty Orazáli Ánýaruly. Oblystaǵy Jańa tehnologııalar kolledjiniń dırektory, zań ǵylymdarynyń doktory Qanatbek Dosalıev – oblys turǵyndary arasynda bedeldi, tanymal azamat. «Oblysta ótken «Aýyl» partııasy konferensııasynda meniń kandıdatýram oblystyq máslıhatqa usynyldy, – dedi Qanatbek Baltabaıuly. – Bárimizdiń de qanattanyp ushqan uıamyz, qazaqtyń altyn besigi – aýyl. Sondyqtan, jaýapkershilik júgi aýyr. Árıne, halyq senimine ıe bolyp, saılaýda jeńiske jetip jatsaq, biz atqaratyn sharýa kóp. Elbasymyz aýyl jaǵdaıyn ońaltý, shaǵyn jáne orta bızneske qoldaý kórsetý jáne eldi jumyspen qamtý máselesin Úkimet múshelerine udaıy tapsyrady. Búgingideı álemdik daǵdarys jaǵdaıynda qalada jumyssyz júrgen jastar kóp. Olardy aýylǵa oraltyp, jeńil nesıemen óz kásibin ashýǵa járdemdessek, jaǵdaılaryn túzep alar edi. Aýyldaǵy tehnıka az, barynyń deni eskirgen. Lızıngke alý qymbat. Kepilge qoıyp alar úı, qora-qopsysyn bankter jaratpaıdy. Oblys ákimi Beıbit Atamqulov aýyldarda MTS ashýǵa talpynys jasap jatyr. Osy istiń júzege asýyna kómektesemiz. Jalpy, «Aýyl» partııasynyń qazaqtyń ulttyq qaınary, kúretamyry aýyldyń ál-aýqatyn kóteretindeı óz baǵdarlamasy bar». Kelesi kezekte úmitker oblystaǵy belgili aýyl sharýashylyǵy ǵalymdary, kezinde aýylda tabysty jumys jasaǵan bilikti basshy, eńbek ozattarynyń basyn qosyp, dóńgelek ústel ótkizgenderin aıtty. «Usynys, pikirlerin jınaqtadyq. Aýylǵa jańa tehnologııa jetistikterin tartý máselesin talqyladyq. Árıne, saılaýda jeńiske jetip jatsaq, osy problemalardy oblys ákimdigimen qoıan-qoltyq jumys jasaı otyryp, kezeń-kezeńimen sheshýge múmkindik týady», – dedi Q.Dosalıev. Baqtııar TAIJAN, «Egemen Qazaqstan». ShYMKENT. Sýret: el.kz