Semeıdiń kıizine máskeýlikter qyzyǵyp otyr

Qazaqstannyń aıazdy, borandy kúninde dalada eńbek etetin jumyskerlerge, qurylysshylarǵa pıma aýadaı qajet. Syrtta jú­re­tinderdiń ásirese, aıaqtary toń­baýy asa mańyzdy. Aıaqtary tońsa densaýlyqtarynan aırylyp, bere­keleri ketedi. Sol úshin de olar kó­bine «Roza» JShS jasaıtyn pımany satyp alyp jatady. Búginde kásiporynnyń jasaǵan pımalary suranysqa ıe bolǵan. Kásipkerler Eýrazııalyq ekonomıkalyq odaq aıasynda taýarlaryn tıimdi baǵamen satyp, paıdaǵa kenelýge múmkindik týyp otyrǵanyn aıtady. Jergilikti kıiz basý kombınaty memlekettiń qoldaýymen qaıta jańǵyrtyldy. Jaqynda kásiporyn ozyq qural-jab­dyq satyp alyp, ónimniń sapasyn ha­lyqaralyq deńgeıge jetkizdi. Semeı­diń kıiz basý kombınatynyń ónim­deri elimizde ǵana emes, shetelderge de keńinen tanylǵan. 20 jyldan beri jumys istep kele jatqan «Roza» jaýapkershiligi shekteýli se­rik­testiginiń pımalary men aıaq kı­im­­derine suranys bir báseńsigen emes. – Bizdiń kıizden jasalǵan aıaq kıimder tutynýshylardyń kóńilin baıaǵyda-aq jaýlap alǵan, – deıdi tigin sehynyń sheberi Alena Che­reje­dınova. – О́ıtkeni, taza jún­nen jasalady. Pımalarymyz qys­tyń qaqaǵan aıazyna tótep berse, etikter men tápishkelerimiz de joǵary talǵammen jasalǵan, óte yńǵaıly. Sońǵy jyldary kásiporyn memlekettiń qoldaýymen aýqymdy jańǵyrtýdan ótti. «Damý» kásipkerlikti damytý qorynan alynǵan qarjyǵa zamanaýı qondyrǵylar satyp alynypty. Qazir eńbek ónimdiligi artyp, ónim sapasy áldeqaıda jaqsardy deıdi mundaǵylar. Jaqynda Semeı kıiz ónimderine Reseı astanasy – Máskeýden suranys túsipti. Alǵash­qy kelisimsharttar da jasalǵan. Kom­bınat kórshi memleketke 100 ton­na­dan artyq kıiz jiberýge keli­sipti. «Roza» JShS jetekshisi Ha­rıs Saı­fýtdınovtyń aıtýynsha, olar semeılik ónimder týraly ǵalam­tordan bilgen eken. Biz jarty oram kıiz jibergenimizde máskeýlikter zerthanalyq tekserýler jasap kórip, sapanyń óte joǵary ekendigine kóz jetkizgen. Reseıge kıiz ónimderin bizden alǵan tıimdi, óıtkeni, Semeı­degi shıkizat qory óte myqty. Jergilikti turǵyndar da kombınat ónimderin joǵary baǵalaıdy. Pımalar men etikter aıaqqa jumsaq ári jyly. Otandyq taýarlar ja­qynda «Qazaqstannyń úzdik taýary» oblystyq baıqaýynda da bıik tuǵyrdan kórinýi tegin emes. Osydan on jyl buryn jún jetpeı jatatyn. Bul kúnderi oblysta mal basy óskendikten, shıkizattan kedergi joq. Barlyq aýdannan mal júni ákelinip tapsyrylady eken. Raýshan NUǴMANBEKOVA. SEMEI.