Eńbegine qaraı mansaby

Keshe Prezıdent janyndaǵy Ortalyq kommýnıkasııalar qyzmetinde «Kásibı memlekettik apparat. Mansaptyq modelge ótý» taqyrybynda brıfıng ótti. Oǵan Memlekettik qyzmet isteri mınıstrligi Memlekettik qyzmet departamentiniń dırektory Álı Kómekbaev pen «Nazarbaev Ýnıversıtet» Memlekettik saıasat joǵary mektebiniń dekany Veng Tat Hýeı qatysty. Brıfıngte birinshi kezekte sóz alǵan Álı Kómekbaev Elbasy Nursultan Nazarbaevtyń memlekettik apparatty kásibılendirýge baǵyttalǵan tapsyrmasyn júzege asyrý boıynsha mı­nıstrlik tarapynan atqarylyp jatqan jumystarǵa toqtala kelip, osy jyldyń 1 qańtarynan bastap kúshine engen «Memlekettik qyzmet týraly» Zańǵa sáıkes qabyldanǵan aktiler men jańa tásilder jóninde aıtyp ótti. «Memlekettik qyzmettiń jańa man­saptyq modeli boıynsha mem­le­kettik organ qyzmetkerleri arasynda joǵary bos laýazymǵa tek ishki konkýrspen, al tómengi laýazymdarǵa jalpy konkýrs arqyly ǵana taǵaıyndalady. О́tken jyly mınıstrlikterde, olardyń vedomstvolarynda jáne jergilikti atqarýshy organdarda orta eseppen 828 azamat ashyq baıqaýsyz ishki aýysý tártibi arqyly qyzmetke ornalasqan. Al qazir jańa talap boıynsha qyzmetke mundaı tásilmen taǵaıyndaýǵa jol berilmeıdi», – dedi Á.Kómekbaev. Sondaı-aq, ol bul modeldiń mem­le­kettik jas qyzmetshilerdiń psı­hologııalyq turǵyda beıimdelýine ári onyń kásibıliginiń artýyna, bo­lashaqqa senimmen qaraýyna jáne memlekettik qyzmet aıasynda uzaq merzimdi mansaptyq ósýdi josparlaýyna oń yqpalyn tıgizetinin jetkizdi. Sonymen qatar, spıker barlyq memlekettik qyzmetshilerdiń jeke jospary bekitilip, soǵan sáıkes at­qarǵan jumysy toqsan saıyn jáne jyl qorytyndysy boıynsha baǵalanyp otyratynyn má­limdedi. Onyń sózine qaraǵanda, árbir memlekettik qyzmetshiniń óz kásiptik mindetin qalaı atqarǵany, eńbek tártibi men ádep qaǵıdalaryn saqtaýy, belsendiligi, jumysqa degen ynta-yqylasy jónindegi baǵany bir ǵana laýazymdy tulǵa emes, bar­lyq áriptesteri beretin bolady. Naq­tylaı aıtqanda, «B» korpýsyndaǵy qyzmetshilerdi baǵalaýǵa tikeleı basshysy, baǵynysty qyzmetkerler jáne áriptesteri qatysady. Budan biz basshyny baǵalaýda odan joǵary turǵan laýazym ıesiniń pikiri ǵana emes, sondaı-aq, áriptesteri men qol astyndaǵy baǵy­nysty qyzmetkerlerdiń de pikirleri eskeriletinin uǵamyz. Shyn máninde, bul tásil bizdiń elimizde alǵash ret qoldanylyp otyr. Odan ári departament dırektory testileýdi uıymdastyrý erejesine qatysty birqatar máselelerdi atap ótti. «Testileýdi uıymdastyrý erejesine ózgerister men qosymshalar engizildi. Endi testileýden ótý jalpy jınalǵan baldardyń jıyntyǵymen esepteletin bolady. Bul tusta, árbir normatıvtik-quqyqtyq aktilerdi bilýge baılanysty testileýdiń shekti máni tómendetildi. Bul óz kezeginde maman jetispeýshiligin ońtaıly sheshýge óz yqpalyn tıgiz­edi», – dedi Á.Kómekbaev. Onyń aıtýynsha, ásirese, bul qadam aýyldyq jáne aýdandyq jerlerdegi maman jetispeýshiligine qatysty máselelerdi sheshýde ózindik mańyzǵa ıe. Sondaı-aq, spıker atalǵan zań aıa­synda mamandarǵa ózderiniń qa­rym-qabiletterin dáleldeýge mol múmkindik berilgenin atap kórsetti. «Memlekettik ákimshilik qyzmetke jańadan ornalasqan memlekettik qyzmetshilerdiń atqaratyn laýazymdaryna laıyqty ekenin tekserý maqsatynda úsh aı synaq merzimi belgilenedi. Memlekettik qyzmetshi synaq merziminde qanaǵattanarlyqsyz nátıje kórsetken jaǵdaıda, oǵan taǵy da úsh aı múmkindik beriledi. О́ıtkeni, qyzmetke jańadan kelgen maman al­ǵashqy úsh aıda túrli sebeptermen ózin ózi dáleldeı almaı qalýy múmkin. Sondyqtan, oǵan taǵy da qosymsha ýaqyt usynylady. Bul óz kezeginde kadrlyq turaqsyzdyq deńgeıin tó­mendetedi», – dedi Á.Kómekbaev. Buǵan qosa, departament dırektory konkýrsty zań sheńberinde ádil ári ashyq ótkizý maqsatynda 5 kúndik merzimi bar apellıasııa qarastyrylǵanyn, mı­nıstrlikte jáne aýmaqtyq departamentterde úmitkerlerdiń sha­­ǵy­­­­­myn qaraý men quqyqtaryn qorǵaý baǵy­tyndaǵy apellıasııalyq komıssııalar qurylatynyn, onyń quramyna táýelsiz baqylaýshylar retinde qoǵamdyq uıymdardyń jáne buqaralyq aqparat quraldarynyń ókilderi kire alatynyn málim etti. Jıynda «Nazarbaev Ýnıversı­tet» Memlekettik saıasat joǵary mek­tebi­niń dekany Veng Tat Hýeı Qa­zaq­­stannyń memlekettik qyzmetti reformalaýda tıimdi ádister qolda­nyp otyrǵanyn aıtty. «Qazaqstan halyq­aralyq tájirıbelerdi engizý arqyly memlekettik qyzmet salasyn reformalaýdyń óte tıimdi sheshimderine júginýde. Bizdiń Memlekettik saıasat joǵary mektebi atalǵan reformalardy jiti qadaǵalaýda. Biz Memlekettik qyzmet isteri mınıstrligimen birge bul úrdiske ózimizdiń úlesimizdi qosyp kelemiz», – dedi ol. Onyń aıtýynsha, Memlekettik saıasat joǵary mektebi halyqaralyq seriktesterimen birge túrli semınarlar ótkizip, Qazaqstannyń memlekettik qyzmet salasyn reformalaýyna qajetti eń ozyq álemdik tájirıbelerdi jınaqtaýǵa ózindik septigin tıgizgen. Sondaı-aq, ol atalǵan mekteptiń memlekettik qyzmet salasyn reformalaýda jaqsy nátıjeler­ge qol jetkizgen AQSh, Sıngapýr, Eko­nomıkalyq yntymaqtastyq jáne damý uıymy elderimen tyǵyz baılanys­ta jumys istep otyrǵanyn jetkizdi. Joldybaı BAZAR, «Egemen Qazaqstan».