Oń úrdis Shanhaıda oqyp júr qazaq qyzy...

Shyǵys-Qytaı pedagogıkalyq ýnıversıtetinde bilimin jetildirip júrgen stýdent Farıda Tóleýbaeva qytaı tili fakýltetiniń «Eń úzdik stýdenti» atandy. Onyń aıtýynsha, qytaı tili fakýltetinde Amerıka, Japonııa, Koreı, Reseı, Ýkraına, Indonezııa sııaqty elderden kelgen stýdentter de bilim alýda. Qaı ýaqytta bolsyn kóp til bilýdiń, onyń ishinde qytaı tilin úırenýdiń qajettigin ómirdiń ózi kórsetip otyr. Bizdiń elimiz ben Qytaıdyń arasyndaǵy ekono­mıkalyq, mádenı baılanys­tar jyldan jylǵa órkendi túrde jal­ǵasýda. Shyǵystanýshy maman­dyǵyna suranys ta artary sózsiz. – Sondyqtan da qytaı tilin úırenip, bilimimdi tolyqtyrǵym keldi, – dedi Farıda skaıp arqyly sóıleskenimizde. – Bir jyl ishinde izdenip, eńbektenip qytaı tilin meńgere bastadym. Eseıgen soń meni ǵasyrlar qatparyndaǵy el tarıhy, ıeroglıfterdiń sıqyry qyzyqtyrdy. 1996 jyly Ekibastuz qalasynda dúnıege keldim. Alty jasymda №22 mektep gımnazııaǵa bardym. Alǵashqy ustazym Sáýle apaı Súleeva. 2013 jyly oblys ortalyǵyndaǵy «Jas daryn» mektebinde «Altyn belgini» ıe­lendim. Ál-Farabı atyndaǵy Qa­­zaq ulttyq ýnıversıteti shy­ǵys­taný fakýltetiniń stýdenti atandym. Qupııaly, jumbaq tildi úırenýime úles qosqan qytaı tili kafedrasynyń oqytý­shy­laryna alǵysym sheksiz. Byl­tyr elimiz­diń joǵary oqý oryn­dary stý­dentteriniń VII Respýb­lıkalyq pándik olımpıadasynda III oryn aldym. 2015-2016 oqý jylynda ýnıversıtet akade­mııa­lyq mobıldik júıemen bilim alýym úshin Shanhaıdaǵy Shy­ǵys-Qytaı pedagogıkalyq ýnı­ver­sıtetine jiberdi. Anam «Jo­lyń­nan qalma, bilim al» dep óz qara­jatymen alys jolǵa shyǵaryp saldy. – Tóleýbaeva 4 synyp oqyp júr­gende óleń jaza bastady. Ádebı kitaptardy menimen bir­ge oqıtyn. 2007 jyly oblys orta­lyǵyndaǵy «Jas daryn» mek­tebine qabyldandy. Synyp je­tekshisi Gúlsheker Belgibaeva oqý­shylardyń bilim alýyna bar kúsh-jigerin jumsady. Qa­­zaq tili men ádebıet pániniń muǵalimi Aı­nash Toqtarhanqyzy Tóleý­bae­vany olımpıadaǵa daıyndady. 2010 jyly respýblıkalyq olım­pıadanyń júldegeri II dárejeli dıplom, kúmis medalin jeńip aldy, – deıdi anasy Qar­lyǵash. – Aıtpaqshy, 16 jasqa tol­ǵan­da anam maǵan syılyq jasady. Sındao qalasyndaǵy bir aılyq qytaı tili kýrsyna ji­berdi. Oqytýshylarynyń ádis­temesi erekshe bolady eken. Shy­ǵys-Qytaı pedagogıkalyq ýnıversıtetiniń kitaphanasynda 3,5 mıllıon tom kitap saqtalady. Aǵylshyn, nemis, fransýz, japon, koreı jáne basqa da tilderdegi ki­taptarǵa toly. Bilim berý júıe­si úzdik, órkenıet jolynda. Jer­gilikti stýdentterdiń kitapqa degen qumarlyǵyna tańǵalasyń. Kitaphanada tehnıkanyń sońǵy úlgisi Mac kompıýterlerimen jumys istep, 7000-nan astam Qytaı kitaptaryna qol jetkize alasyz. Arnaıy termınaldar arqyly kitap qorynan kerekti aqparatyńyzdy tez arada óz uıaly telefonyńyzǵa júkteı alasyz. Stýdentterge ar­nalǵan arnaıy sý, sháı, kofe arzan baǵamen satylatyn apparat ornalasqan. Tipti, stýdentterdiń minez-qulqyna qaraı jekeshelengen nemese kópshilik otyratyn oryndar qarastyrylǵan. Bir jerde Italııadan kelgen stýdentter qytaı tiliniń qyr-syryn meńgerip, kitaptan bas almaı otyrsa, endi bir jerde Koreıa stýdentteri qytaı ti­linde fılm kórip otyrady. Men oqyrmandardyń, jastardyń kitap oqýǵa degen qushtarlyqtaryn alǵash ret kórdim, – dedi F.Tóleý­baeva bizge baılanys barysynda. – Qyzym ýnıversıtettiń bı­ylǵy birinshi semestrinde «Eń úzdik stýdent» degen dıplomǵa ıe boldy. Qytaı tilinde jazylǵan dıplomyn kórip, uzaq qaradym. О́zge elde júrip, úzdik atanǵany úlken qýanysh. Qyzymnyń bola­shaǵynan úmit kútemin. Oqýyn bitirip, týǵan eline oralyp, eldik múdde-maqsat jolynda eńbek etedi dep oılaımyn. Qazir Afrıka, Arab, Kolýmbııa, Italııa, Koreı elderiniń stýdentterimen tanysyp, ózderi bir úlken otbasy bolyp ketkendeı, – deıdi anasy bizben áńgimesinde. Jýyrda oblys ákimdiginde Qytaıdyń Shansı provınsııa­synan kelgen delegasııa ókil­derimen kezdesý bolǵany esi­mizge tústi. – Pavlodar oblysymen óner­kásip, bıznes, bilim berý salasynda birlesken jobalardy júzege asyrýdy qolǵa alamyz, – dep edi sonda Qytaı delegasııasynyń basshysy. Al, oblystyq bilim berý bas­qarmasynyń basshysy Baqyt Bekseıitovanyń aıtýynsha, oblys­ta qytaı tilin oqytatyn mamandar joq kórinedi. Biraq, Tóleýbaeva sekildi jastar arasynda qytaı tiline degen suranys ta bar, qyzy­ǵý­shylyq ta kóp eken. «Bilimdi Qytaıdan bolsyn izdeńder» degen. Sol izdeý ýa­qyty keldi. Qazirgi bizdiń jas­tarymyzdyń moıyndarynda úlken jaýapkershilik tur. Ol – órkenıetti bilim alyp, elimizdiń eńsesin damyǵan 30 eldiń qataryna qosý. Al, kóp til bilý ómir talaby. Shetelde oqyǵan ul-qyzdar elge qaıtýy qajet. Bul odan da úlken talap. Árıne, Farıda sııaqty óz stýdentterimizdiń de oblys ortalyǵyna qytaı tilin úıretýshi maman bolyp kelip jatsa, quba-qup. Farıda BYQAI, «Egemen Qazaqstan». Pavlodar oblysy.