• 13 Aqpan, 2016

Aqparattar aǵyny

344 ret

kórsetildi

2 mın

oqý úshin

Egemen Qazaqstan

● Eýrazııalyq damý banki Qazaqstan ekonomıkasyna 1 mlrd. dollardan astam ınvestısııa quımaqshy. Al bul qarjynyń basym bóligi Aqtóbe men Mańǵystaý oblystaryn gazdandyrý jáne jańǵyrtý baǵdarlamasyn qarjylandyrýǵa jumsalmaq. Ol úshin atalǵan ınvestısııadan 128,2 mln. dollar aýdarylady. Sonymen qatar, 236 jumys orny ashylady. ● Astanada «Bolashaq» halyqaralyq stıpendııasynyń Til mektebi ashyldy. Munda «Memlekettik qyzmetshiler», «Ǵylymı-pedagog qyzmetkerler», «Mádenıet qyzmetkerleri», «BAQ redaksııasynyń qyzmetkerleri» jáne «JOO túlekteri» sanattary boıynsha oqýǵa túsken alǵashqy 60 stıpendıant bilim alady. Aıta keteıik, atalǵan mektepte shákirtter aǵylshyn tilin oqytýdyń «6+6»jańa pishini boıynsha dáris alady. ● Qaraǵandyda «Salamatty Qazaqstan» medısınalyq poıyzy tegin qyzmet kórsetýdi bastady. Dárigerler shoǵyrlanǵan poıyz oblystaǵy shaǵyn stansalar men olarǵa jaqyn mańdaǵy aýyldarǵa baryp, turǵyndardyń densaýlyǵyn tekseredi. Sapar barysynda medısına mamandary Qaraǵandynyń 19 stansasyn aralaıtyn bolady. ● Qostanaı oblysynda aýyl turǵyndary óz kúshterimen kıno túsirdi. Shalǵaıdaǵy Kólqamys eldi mekeninde túsirilgen kınotýyndy «Káýsarym» dep atalady. Onda kompıýter men uıaly telefonnyń, áleýmettik jeliniń tutqynyna aınalǵan jasóspirimniń aýylǵa kelip, qatarlastarymen aralasyp, oıynnyń qyzyǵyna batqan shaǵy sýretteledi. Qysqametrajdy fılm 37 mınýtty quraıdy. ● «Analar úıi» respýblıkalyq qoǵamdyq jobasynyń Pavlodar fılıalynda tigin sehy ashyldy. Mundaǵy qyz-kelinshekter «Analar úıiniń» quryltaıshysy bolyp tabylatyn iri qurylys kompanııasyna arnaıy kıim tigedi. Aıta keteıik, atalǵan ortalyqqa ómirde qıyn jaǵdaıǵa tap bolǵan analar kelip, kómek suraıdy. Al fılıal qyzmetkerleri olardy ýaqytsha baspanamen qamtyp, jumys beredi. ● Aqmola oblysyndaǵy Andyqoja batyr aýylynda balabaqsha ashyldy. Bul «Balapan» baǵdarlamasy aıasynda júzege asty. Mektepke deıingi bilim uıasy 50 orynǵa laıyqtalǵan. Memlekettik «Baldáýren» balabaqsha qurylysy úshin aýdandyq bıýdjetten 4 mıllıon teńge bólingen. Habarlar Úkimet, oblystyq ákimdikter saıttary, «QazAqparat» agenttigi jáne «24kz» telearnasynyń derekteri boıynsha daıyndaldy.