Tipti, túpkilikti saýyqpasa da, syrqattyń odan ári dendeýiniń aldyn alý úshin túrli jattyǵýlardyń ózi jetkilikti emes pe? Osyǵan dálel retinde Atyraýdaǵy arnaýly mektep-ınternatta kózi nashar kóretin balalar úshin arnaıy korreksııalyq synyptar ashyldy. Bul synyptardyń ashylýyna oblys ákimdigi qoldaý kórsetipti. Nege? О́ıtkeni, Atyraýda kózi nashar kóretin 166 bala bar. Olardyń óz qatarlastary sekildi alańsyz bilim alýyna kóz janary kedergi jasaıdy. Soǵan keıbiri jalpy bilim beretin mektepterge barǵan. «Meniń ulym Sergeıdiń jasy 8-de, osy kezge deıin jalpy bilim beretin mektepke baryp júrdi. Biraq sabaqtan qınalyp keletin. О́ıtkeni, kózine kóp kúsh túsetin edi.
Endi memlekettiń qoldaýymen arnaıy korreksııalyq synypta dáris alatynyna qýanyshtymyn. Ulym da qýanyp otyr», deıdi onyń anasy Olga Ǵızatýllına. Al keıbir balalar buǵan deıin óz úılerinde dáris alyp kelipti. Endi sondaı balalardyń bárine korreksııalyq synyptarda bilim alýǵa múmkindik jasalyp otyr. Qazir arnaýly mektep-ınternatta kózi nashar kóretin balalarǵa arnalǵan korreksııalyq synyptyń úsheýi bar. Munda qazaqsha jáne oryssha 18 oqýshy dáris alady. Olardyń ishinde 8 bala aýdandardan kelgen. Olar úshin arnaıy jataqhana, ashana jabdyqtalǵan. Balalar tórt mezgil tamaq ishedi. Qalada turatyn balalar úshin arnaıy avtobýs bar. Árıne, kóz janarynda kireýke bar balalarmen arnaıy mamandarǵa bolmasa, kez kelgen muǵalimge dáris ótkizýdiń qıyndyǵy bar.
Sol sebepten, defektolog-tıppopedagog Saıragúl Zaıdolla jumysqa shaqyrylypty. Jas maman byltyr Abaı atyndaǵy Qazaq ulttyq pedagogıkalyq ýnıversıtetin bitiripti. «Mundaı balalarmen dáris ótkizýdiń ózindik ereksheligi bar. Ár dáris 30-35 mınýtten aspaýy tıis. Ár sabaqtyń arasynda kózge arnalǵan jattyǵýlar jasatamyn. Ár balamen jeke jumys jasaımyn. Kózdi túzetý sabaǵyn ótkizemin. Bul kóz bulshyq etteriniń shynyǵýyna, kózdiń tynyǵýyna oń áser etedi», deıdi kórýi nasharlaǵan balalarmen jumys isteýdiń mánisin biletin jas maman. Teginde balanyń qýanǵanyna eshteńe jetpeıdi. Kózi nashar kóretin balalarǵa arnalyp ashylǵan korrekssııalyq synypta bári bar: arnaıy parta, qosymsha jaryq, kitap astyna jabdyq. Korreksııalyq synyptaǵy ár balanyń ahýalymen tanysyp, ata-analarymen sóılesken oblys ákiminiń orynbasary Shyńǵys Muqan «Memlekettik saıasattyń basym baǵyty – halyqtyń áleýmettik turmysyn jaqsartý.
Sonyń bir dáleli retinde kózi nashar kóretin balalardyń alańsyz bilim alýyna jaǵdaı jasaýdy kózdedik. Árıne, úıde bilim alýyn uıymdastyrýǵa bolady. Biraq mektepke kelip, sapaly bilim alǵannyń jóni bólek qoı. Onyń ústine ár bala ortaǵa beıimdeledi, jańa tanystar, dostar tabady. Oı-órisi damıdy, qorshaǵan ortaǵa kózqarasy qalyptasady. Bul balalar da qatar-qurbylarymen birge bilim alýǵa quqyly ǵoı. Osyndaı balalarymyzdyń shyraǵy sónbese eken», degen pikirimen bólisti. Ár balaǵa ákimniń atynan syılyq usyndy. Al balalar ózderine arnalǵan konserttik baǵdarlamaǵa rızashylyqpen qol soǵyp otyrdy.
Joldasbek ShО́PEǴUL, «Egemen Qazaqstan». ATYRAÝ.
Sýretti túsirgen Rahym QOILYBAEV.
