Ańyzǵa aınalǵan adam

Aýǵan soǵysynyń ardageri Borıs KERIMBAEV týraly «Qazaqtyń qara maıory», «Korol Pandjshera» atty qos kitaptyń tusaýkeseri ótti. Almatydaǵy Ulttyq kitap­hanada – tanymal azamat týraly syr terbegen qos kitaptyń tusaýyn kesý saltanatyna elimizdiń tanymal azamattary – Qazaqstan­nyń Eńbek Eri Aıagúl Mırazova, aýǵan soǵysynyń ardageri, Keńes Odaǵynyń Batyry Nıkolaı Kremenısh, qoǵam qaıratkeri-belgili til janashyry, ult patrıoty Asyly Osman, Álemniń birneshe dúrkin chempıony, palýan Dáýlet Turlyhanov, qalalyq Tilderdi damytý, muraǵattar men qujattama basqarmasynyń basshysy Mamaı Ahetov, áskerı ǵylymdardyń doktory, professor Kım Serikbaev qatysty. – Áskerı-jaýyngerlik ilimde «qa­ra maıor» atanǵan saıypqyran sardar Borıs Kerimbaev ta, osy qos kitapty jazyp shyqqan onyń aýǵan soǵysyndaǵy áriptesi Baqytbek Smaǵul da – elimizdiń erekshe minezdi azamattary sanalady,– dedi óz sózinde polkovnık Kım Serikbaev. – Daryndy áskerı qolbasshy týraly daryndy azamat jan dúnıesimen sezimge berilip jazǵan bul shyǵarmasy áskerı salanyń ardageri bolǵandyqtan da maǵan sondaı jaqyn. Eki kitaptyń da alǵysózin ózim jazdym. Qan maıdanda qatardaǵy jaýyngerdiń ómiriniń qaýipsizdigi onyń bilikti komandırine baılanysty. Kitapta árbir soldaty úshin shyryldap keýdesin oqqa tósegen batyl qolbasshynyń beınesi ádemi ashylǵan. Tarıhı ádebıettiń búgingi urpaqty «Máńilik El» ulttyq ıdeıasy aıasynda áskerı-patrıottyq tárbıe berýge qosar úlesi óte zor bolmaq. Tusaýkeser minberinen sóz alǵandar bir kezdegi typ-tynysh jatqan eldiń talaı-talaı beıbit turǵyndarynyń júregin jaralaǵan «aýǵan soǵysynyń» zardabyn eske túsirdi. Qapshaǵaıda jasaqtalǵan KSRO MBB Bas shtabynyń №177 aıryqsha maqsattaǵy otrıadynyń sol kezdegi komandıri Borıs Kerimbaevtyń Aýǵan-Pandjsher aýmaǵyndaǵy kózsiz erligi týraly qıly-qıly qyzyqty da qasiretti estelikter aıtyldy. Qashanda maıdan adam shyǵynynsyz bolǵan ba? Qurban bolǵandardyń arýaǵyna Quran oqyldy. Jıyndy júrgizgen belgili kınoakter, qoǵam qaıratkeri Oryn­basar Tazabekovtiń 18 jasynda áıgili komandırdiń qolastyna túsip «aýǵan tajalynan» aman oralǵany – sardarynyń, «qara maıordyń», arqasy ekeni týraly aıtqan sózi kópshiliktiń janyn tebirentti. Saltanatty qaýyshýǵa Baýyr­jan Momyshuly atyndaǵy ás­kerı mekteptiń shákirtteri, aýǵan soǵysyna qatysýshylar, qoǵamdyq uıymdardyń ókilderi qatysty. Bir top aýǵandyq jaýyngerlerge B.Momyshuly atyndaǵy arnaıy tósbelgiler tapsyryldy. Marapattalǵandar ishinde respýblıkalyq «Baldyrǵan» jýrnalynyń bas redaktory, belgili jýrnalıst-jazýshy, aýǵan soǵysynyń ardageri Dúısen Maǵlumov, álemge áıgili palýan, ult maqtanyshy Dáýlet Turlyhanov, tanymal kınorejısser Rústem Ábdirashev jáne basqalary bar. «Esh ýaqytta shen men shekpenge talaspaǵan, parasat bıiginen aspaǵan» «qazaqtyń qara maıory» Borıs Tókenuly konferensııa uıymdastyrýshylary men kitap avtory, maıdandas baýyry, memleket jáne qoǵam qaıratkeri Baqytbek Smaǵulǵa alǵysyn bil­dirdi. Talǵat SÚIINBAI, «Egemen Qazaqstan». ALMATY. ––––––––––– Sýretti túsirgen Nıkolaı SÝDAKOV.