QYZYLORDA. 15 aqpan. 11-14 aqpan aralyǵynda Qyzylorda oblysy, Aral qalasynda voleıboldan 2000-2001 jyly týǵan jasóspirimder arasynda Ashat Ahanovty eske túsirýge arnalǵan respýblıkalyq týrnır aıaqtaldy. Bul týraly oblystyq sport jáne deneshynyqtyrý basqarmasyna silteme jasaǵan egemen.kz habarlady.
Bıyl besinshi márte uıymdastyrylǵan jarysqa Aqtóbe, Mańǵystaý, Ońtústik Qazaqstan jáne Qyzylorda oblystarynan 29 komanda (uldar 14, qyzdar 15 komanda) qatysty. Komandalarda 300-ge jýyq sportshy boldy. Tórt kúnge sozylǵan jarystyń qorytyndysy boıynsha uldar arasynda Shıeli aýdanynyń komandasy qatarynan úshinshi márte týrnırdiń jeńimpazy atandy. Ekinshi oryndy Aqtóbe oblysy Baıǵanın aýdanynyń qurama komandasy ıelense, úshinshi oryndy Aral aýdanynyń komandasy enshiledi. Qyzdar arasynda Aqtóbe oblysy Hromtaý qalasynyń sportshylary myqtylyqtaryn dáleldese, kúmis júlde Syrdarııa aýdanyna, qola júlde Aqtóbe oblysy Yrǵyz aýdanynyń komandasyna buıyrdy.
Týrnırdiń úzdikteri:
Uldar arasynda
Úzdik qorǵaýshy – Mamyr Alǵıuly (Baıǵanın aýdany)
Úzdik baılanystyrýshy – Aıat Ramazanuly (Shıeli aýdany)
Úzdik shabýylshy – Jandos Shamranov (Aral aýdany)
Qyzdar arasynda:
Úzdik qorǵaýshy – Ámına Jumanova (Aral aýdany)
Úzdik baılanystyrýshy – Sandýǵash Jolmyrza (Hromtaý qalasy)
Úzdik shabýylshy – Gúlsim Keńesbekova (Syrdarııa aýdany)
Jeńimpazdar men júldegerler dıplom, medal, kýboktarmen marapattalsa, nomınasııa ıegerlerine dıplom jáne estelik syılyqtar tabys etildi.
Erjan Baıtiles.
Derek, sýret: Qyzylorda oblystyq sport jáne deneshynyqtyrý basqarmasy.
