Komanda-sensasııa!

Fýtzaldan Eýropa birinshiligine tuńǵysh ret qatysyp, úshinshi oryndy jeńip alǵan Qazaqstan quramasy osylaı atalyp otyr Qazaqstan fýtbolynyń tarıhyna taǵy jańa jar­qyn bet qosyldy. Bul joly shaǵyn fýtboldyń sheber­leri erledi. Burnaǵy kúni túnde elimizdiń quramasy Serbııanyń astanasy – Bel­gradta márege jetken fýtzaldan Eýropa chempıonatynyń fınalynda alań ıelerin 5:2 esebimen utyp, qola júldeger atandy. Bas jattyqtyrýshy Kakaýdyń shákirtteri osylaısha ózderi tuń­ǵysh ret qatysyp otyrǵan qurlyq birinshiliginde qola medalǵa qol jetkizdi. О́ziniń bastaýyn 1996 jyldan alatyn bul dop dodasy shejiresinde debıýtanttyń bulaısha joǵary tabysqa jetýi buǵan deıin bolmaǵan eken. Al úshinshi oryn úshin talas óte qyzý bastaldy. Onyń birden asa tartysqa toly bolǵanyn kezdesýdiń birinshi taımynda bar-joǵy bir gol soǵylǵanynyń ózi anyq ańǵartady. Biraq komandalar bir-birleriniń ańysyn ańdyp, qorǵanysty qolaılap otyrǵan joq. Bul jaǵynan asa belsendi qımyldaǵan jasaqtar kórermendi udaıy ózine nazar aýdartyp turdy. Buǵan bir jaǵy serbterdiń jergilikti jankúıerlerdiń demeýimen úzdiksiz alǵa umty­lýlary áser etse, ekinshi jaǵy­nan qazaqstandyqtar óziniń tarı­hyndaǵy eń alǵashqy iri ha­lyqaralyq jarysynan júldemen oralýǵa bar kúshin saldy. Qonaq­tardyń negizgi qaqpashysy Igı­tanyń dıkvalıfıkasııadan keıin osy matchqa qosylýy da bizdiń jigitterdi jigerlendire tústi. Osyndaı tartysty talasta qaq­paǵa qaraı kósilte dop urý da ońaı bolǵan joq. Ondaı sát birinshi ret tek 9-mınýtta ǵana múmkin boldy. Serbterdiń 34 jastaǵy forvardy Vladımır Lazıch bizdiń golkıpermen jekpe-jek shyǵyp, dopty onyń ústinen asyra tastady. Dop sol boıy torǵa qaraı kirip bara jatqanda, ony sońǵy máýritte Leo qaıtaryp úlgerdi. Munyń sońyn ala qazaqstandyqtar jaqsy qarsy shabýyl uıymdastyrdy. Olardyń buryshtamadan tastaǵan dobyn Mıhaıl Pershın qaqpaǵa shirene urdy. Biraq ol qaqpa baǵanyna tıip keri serpildi. Al taımdaǵy jalǵyz gol 20-mınýtta soǵyldy. Ony qarsy qaqpa buryshynan sańylaý tapqan bizdiń Dýglas túsirdi. Ol serbter darbazashysy Mıodrag Aksentıevıchtiń qateligin óte jaqsy paıdalandy. Ekinshi taım endi qazaqstan­dyqtardyń shabýylymen bastaldy. Ol jáne bizdiń jigitterdiń esepti tez ulǵaıta alýyna ulasty. Sóıtip, 21-mınýtta Serik Jamanqulov óte qatty soqqymen Aksentıevıchtiń sol jaq «búıirin» búlk etkizdi. Osymen týrnırdegi altynshy golyn soqqan fýtbolshymyz esepti 2:0-ge jetkizdi. Osy goldan keıin serbter taıly-taıaǵy qalmaı alǵa umtyldy. Al qazaqtar qorǵanysta ǵana qalmaı, birinshi múmkindik bolǵan sátte-aq qarsy shabýyl uıymdastyrýǵa kúsh saldy. Olar 29-mınýtta Aleksandr Dovgan shabýyl ótinde bolǵan sátte esepti ulǵaıtýdyń bir múmkindigin jiberip aldy. Arada bir mınýt ótkende, Dýglas sol ókinishtiń ornyn toltyryp berdi – 3:0. Budan keıin burynǵydan beter ashynyp ketken alań ıeleri qorǵanysty múldem umytqandaı boldy. Olar darbazashyny altynshy oıynshyǵa aýystyryp, jappaı alǵa umtylyp jatqan sátte meımandar taǵy da osydan ońtaıly nátıje shyǵarýdyń joldaryn qarastyryp jatty. Muny jáne kóp kútýge de týra kel­gen joq. Bizdiń jigitter osylaısha 32-mınýtta esepti 4:0-ge bir-aq apardy. Ony qarsy jaq qaq­­pasynyń bos turǵanyn paı­da­­lan­ǵan Igıta alys­tan uryp dóp túsirdi. Qazaqstan quramasy kezdesýdiń 36-mınýtynda tablodaǵy esepti 5:0 etti. Bul joly da Dýglas mer­gendigimen kózge túsip, oıyn­daǵy het-trıgin jasady. Ol qaqpashymen birge-bir shyqqan sátin múlt jibergen joq. Osydan keıin qazaqstandyqtar birshama bosańsyp qaldy. Olar qalǵan 4 mınýtta serbterdiń erkin oınaý­laryna múmkindik berip qoıdy. Sonyń nátıjesinde alań ıeleri eki doptyń qarymtasyn qaıtaryp úlgerdi. Aldymen 38-mınýtta Stefan Rakıch gol saldy, sosyn fınaldyq ysqyryq estilýge eki sekýnd qalǵanda Slobodan Raıchevıch mergendigin tanytty. Bir aıta ketetin jaıt, osynyń aldyndaǵy jartylaı fınalda Reseı qura­masynan over-taımda utylǵan Serbııa fýtbolshylarynyń sharshap qalǵany da tez baıqaldy. Al olardy óz úıiniń tórinde tas-talqan etip jeńgen Qazaqstan quramasy osylaısha tuńǵysh ret Eýropa birinshiliginiń qola júldesine qol jetkizdi. Chempıonattyń altyn júldesi osynyń aldynda, jartylaı fınalda Qazaqstan komandasyn súrindirgen Ispanııa quramasynyń qanjyǵasyna baılandy. Ispandar fınalda reseılikterdi 7:3 ese­bimen oısyrata utty. Osymen Reseı quramasy qatarynan úshinshi ret chempıonattyń fınalynda qarsylastaryna ese jiberip, kúmis medaldy qanaǵat tutyp otyr. Jeńis qutty bolsyn, qurmetti qazaqstandyqtar! Damır QOJAMQUL.