Zııaly qaýym ókilderimen kezdesti

Almaty qalasyndaǵy Dostyq úıinde Qazaqstan Respýblıkasy Mádenıet jáne sport mınıstri Arystanbek Muhamedıuly shyǵarmashylyq jáne zııaly qaýym ókilderimen kezdesti. Mınıstrmen ótken kezdesýge KSRO jáne Qazaqstannyń halyq ártisi, Memlekettik syılyqtyń laýreaty Asanáli Áshimov, Qazaqstannyń eńbek sińirgen qaıratkeri, Memlekettik respýblıkalyq koreı komedııa teatrynyń dırektory Lıýbov Nı, kórnekti jazýshy Smaǵul Elýbaı, Qazaqstan Respýblıkasy Ulttyq kitaphanasynyń dırektory Álibek Asqar, sondaı-aq, teatr, ádebıet, mýzyka jáne kınematografııa salasynyń, beıneleý jáne qolóner, tarıh pen arheologııa salalarynyń tanymal tulǵalary qatysty. Keleli keńestiń basty taqyryptarynyń biri Elbasy belgilegen 5 ınstıtýttyq reformany iske asyrýdyń «100 naqty qadam» Ult Josparynyń oryndalý barysy men oǵan óner, mádenıet qaıratkerleri qosar úles pen baǵyt-baǵdar haqynda boldy. Bul jóninde respýblıkalyq Ulttyq kitaphana basshysy Álibek Asqar «Jospardyń negizgi baǵyttaryn sapaly jáne merziminde oryndaý – qazaqstandyq qoǵamnyń jarqyn da jemisti bolashaǵy jolynda jan-jaqty órkendeýdiń jańa kezeńine esik ashatyndyǵyn» sıpattaı otyryp, elimizdiń búginge deıingi qol jetkizgen jetistikteri men jeńisti qadamyn naqty mysaldarmen baıandap ótti. Naýryz aıynda elimizde ótetin Parlament Májilisine kezekten tys ótkizilgeli otyrǵan saılaý naýqany týraly áńgime de bul kezdesýde kún tártibine saı qozǵaldy. El zııa­lylary bul mańyzdy naýqanǵa óz úlesterin qosyp, saılaýaldy jumystar júrgizile bastaǵan tusta keńinen qoldaý kórsete otyryp, halyqty saılaýǵa jumyla qatysýǵa shaqyratyndyǵyn, el erteńi men kemel keleshek úshin tarıhı sheshýshi sátke belsene aralasýǵa saılaýshylardy úndeıtindigin tilge tıek etti. Mınıstr men zııaly qaýym ókilderi arasynda ótken kezdesý sheńberinde qozǵalǵan taǵy bir mańyzdy taqyryp, ıaǵnı elimizde tuńǵysh ret ótkeli otyrǵan aıtýly meıramnyń biri – Alǵys aıtý kúnin keń kólemde jáne joǵary deńgeıge saı merekeleý máselesi de boldy. Arystanbek Muhamedıuly mınıstrlik tarapynan búgingi tańda elimizdegi barlyq etnos ókilderiniń bir-birine alǵys sezimin bildirý men qaıyrymdylyq kórsetýge bastaıtyn ulyq merekeni uıymdastyrý men daıyndyq jumystary qyzý júrgizilip jatqanyn jetkizdi. Bul kúni búkil el kóleminde kóptegen mádenı-buqaralyq is-sharalar, tea­tr sahnalary men kınoteatrlarda arnaıy qoıylymdar men fılmder kórsetilip, otandyq kitaphanalar men murajaılarda kórmeler uıymdastyrylatyndyǵy, túrli deńgeıdegi kezdesýler men konferensııalar ótkiziletindigin atap ótti. – Elbasy Nursultan Nazarbaevtyń 2016 jylǵy 14 qań­tardaǵy Jarlyǵymen halqy­myzdyń aýyzbirshiligi men tatý­lyǵynyń uıytqysy bolǵan Qazaq­stan halqy Assambleıasy qurylǵan kún – 1 naýryz elimizde Alǵys aıtý kúni bolyp bekitilgendi. Memleket basshysy Qazaqstan azamattaryna arnaǵan sózinde: «Bul kún barsha qazaqstandyqtardyń bir-birine degen qaıyrymdylyq, dostyq pen ystyq sezimderiniń shynaıy merekesine aınalýy tıis», – degen jyly lebizi elimizdegi barsha ult ókilderiniń baýyrlastyǵyn arttyra túseri anyq. Merekeniń barlyq sharalary Qazaqstan halqynyń birligi men yntymaǵyn arttyrýǵa, memlekettik tildi nasıhattaýǵa jáne óskeleń urpaq boıynda qazaqstandyq patrıotızm sezimin tárbıeleýge baǵyttalady, – dedi Mádenıet jáne sport mınıstri Arystanbek Muhamedıuly. Qanat ESKENDIR, «Egemen Qazaqstan». ALMATY. Sýretti túsirgen Borıs BÝZIN.