Aýǵan soǵysynyń qurbandaryn eske aldy

Keshe Astana qalasyndaǵy jaýynger-ınternasıonalıster memorıaly alańynda Keńes áskerleriniń Aýǵanstannan shyǵarylǵanyna 27 jyl tolýyna oraı gúl shoǵyn qoıý rásimi ótti. «Nur Otan» partııasy janyndaǵy «Jas Otan» jastar qanaty men Aýǵanstan jáne jergilikti soǵys ardagerleri odaǵy birlesip uıymdastyrǵan is-sharaǵa Aýǵan soǵysyna qatysýshylar, olardyń ata-analary men týǵan-týystary jáne «Jas ulan» áskerı mektebiniń tárbıelenýshileri qatysty. Patrıottyq sharada Aýǵan soǵysynyń ardageri, Halyq Qaharmany, general-leıtenant Baqytjan Ertaev Qazaqstannan attanǵan jaýyngerlerdiń er­lik­terin eske alyp, olardyń ın­ternasıonaldyq boryshtaryn abyroımen atqarǵanyn aıtty. «Aýǵan soǵysynyń aıaq­tal­ǵanyna 27 jyl tolǵanymen, sol bir zulmat jyldardyń qaıǵy-qasireti áli de bolsa kóptiń kó­keıinde. Sebebi, talaı otbasyn qan jylatqan sol soǵysta bireý ulynan, endi bireý asyl jarynan, al bireýler ákelerinen aıyryldy. Sondyqtan qyr­shyn ketken bozdaqtardyń erlikterine taǵzym etip, qurmet kórsetý – bizdiń min­detimiz», – degen B.Ertaev búgingi Otan qorǵaýshylardyń senim­di de batyl bolýy úshin osyndaı sha­­ralardyń paıdasy zor ekenin jetkizdi. Sonymen qatar, Aýǵan so­­­­­ǵy­synyń ardageri, qoǵam qaıratkeri Baqytbek Smaǵul: «Bul kún – Aýǵanstannan aǵyl­­­ǵan temir tabyttar toq­taǵan, analar kóz jasyn kól qylyp, balalaryn joqtaǵan kún. Elbasy aıtqandaı, ár qa­zaqstandyq erlik pen eldik­ti ushtastyryp, elimizdiń kórkeıip, órkendeýine eńbek etýi tıis. Sol sebepti, osyndaı sharalarda batyr uldarymyzdyń erlikterin nasıhattap, jastarymyzdy Otan úshin qanyn tókse de, aryn tókpeıtin patrıot etip tárbıeleýge umtylýymyz kerek. Endi eshqashan soǵys bolma­syn!», – dedi. О́z kezeginde Astana qalasy ákiminiń orynbasary Ermek Aman­shaev búginde elordada myńnan astam Aýǵan soǵysy­nyń ardageri turatynyn, olardyń Táýelsiz elimizdiń kórkeıýi jo­lynda jemisti eńbek etip jatqandaryn jetkizdi. Shara sońynda Aýǵan soǵysynda qaza tapqan jaýyngerlerdiń qur­metine bir mınýt únsizdik jarııala­nyp, qatysýshylar me­morıalǵa gúl shoqtaryn qoıdy. Aıta keteıik, 1979 jyldyń 25 jeltoqsany men 1989 jyl­dyń 14 aqpany aralyǵynda san myń­daǵan keńestik áskerı­ler Aýǵanstan jerinde Otan al­dyndaǵy boryshyn ótedi. Olar­dyń qatarynda 22 269 qazaqstandyq bolsa, solardyń 924-i sum soǵystyń qurbany boldy, al 1015-si elge múgedek bolyp oraldy. Al 21 jerlesimiz iz-túzsiz joǵalǵandardyń tizimine qosyldy. Elaman QOŃYR, «Egemen Qazaqstan».