Áńgime ózegi – ádil saılaý

Prezıdent janyndaǵy Ortalyq kommýnıkasııalar qyzmetiniń jergilikti fılıalynda Saılaýdy baıqaý jónindegi respýblıkalyq qoǵamdyq komıssııa oblystyq bólimshesiniń músheleri BAQ ókilderimen brıfıng ótkizip, onda saılaýdy ádil de ashyq ótkizý máselesi negizgi taqyryp arqaýyna aınaldy. Ol týraly bólimsheniń je­tek­shisi Sergeı Hýdıakov áńgimelep berdi. Onyń sózine qaraǵanda, Parlament Májilisi saılaýy men barlyq deńgeıdegi máslıhattar saılaýyn halyqaralyq talap­qa saı uıymdastyrýdyń múmkin­dikteri qoǵamdyq uıymdar tarapynan da jiti qarastyrylyp otyr. Eń basty mindet saıası naýqandy zańǵa saı ótkizý, túrli burmalaýshylyqtarǵa jol bermeý bolyp tabylady. Partııalyq tizim boıynsha óz úmitkerlerin usynǵan saıası partııalarmen júzdesýdiń kestesi jasalǵan. Ol boıynsha aıtylǵan usynystar men ótinishter barynsha eskeriletin bolady, deı kelip, Sergeı Geroldovıch odan ári oblys ortalyǵynda qurylǵan qoǵamdyq komıssııa quramyna tájirıbeli adamdardyń tartylǵanyn, mundaı qurylymdar aýdandarda da óz jumysyn bastaǵanyn jetkizdi. Komıssııa múshesi Aqláılek Jaýkına óz sózinde saıası naýqan kezinde zań buzýshylyqtardyń oryn almaýyn baqylaý jáne onyń aldyn alý jumystarymen aınalysýdyń tıimdi joldary belgilengenin, depýtattyqtan úmi­t­kerlerdiń saılaýaldy shara­larynyń zańdylyǵyn, buqaralyq aqparat quraldary arqyly júr­giziletin nasıhattaǵy tepe-teńdikti qadaǵalaýdyń mańyzyna toqtaldy. Komıssııaǵa eriktiler biriktirile otyryp, búginde olardyń sany 700-den asqan. Olardyń saıası biliktiligin jetildirý maqsatymen nusqaýlyq kitapshalar taratylyp berilgen. Qysqa merzimdi semınarlar, dóńgelek ústelder jeke jaýapkershilikteri men bilimderin kóterýge baǵyttalǵan. Brıfıngke qatysqan Saılaýdy baı­qaý jónindegi respýblıkalyq qoǵam­dyq komıssııanyń jergilikti ókilderi saılaý kezinde saılaý ýchas­keleri boıynsha baıqaýshylar rólin de atqaratyndaryn málim­dedi. О́mir ESQALI, «Egemen Qazaqstan». Soltústik Qazaqstan oblysy.