Qostanaıda talapkerler Reseıdiń joǵary oqý oryndaryn tańdaıdy

QOSTANAI. 16 aqpan. Qostanaıda talapkerlerdi jyl saıyn Reseı joǵary oqý oryndary tartyp alady. Olar jyl saıyn erte bastan mektepterge kelip, oqýshylarmen aldyn ala jumystar júrgizedi. Bilim berý salasynyń keńeıtilgen májilisinde oblys ákiminiń orynbasary Marat Júndibaev osylaı málimdedi. Bul týraly ng.kz saıtyna silteme jasaǵan egemen.kz tilshisi habarlady. Keńeıtilgen májiliste oblystyq bilim berý basqarmasy basshysynyń orynbasary Kamıl Ibragımovtyń aıtýynsha, ótken jyly oblystan 530 túlek shet eldegi joǵary oqý oryndaryna túsken. Al oblystaǵy barlyq mektepti 4000-ǵa jýyq bala bitirgen. Sala basshysynyń aıtýynsha, ótken jyly Ulttyq birińǵaı testiden de túlekter aldyńǵy jylǵa qaraǵanda kóńildegi kórsetkishke jete almaǵan. Byltyr ortasha 78,79 ball jınap, respýblıka boıynsha 9 oryndy alsa, aldyńǵy jyly tórtinshi orynda bolatyn. Al Reseıdiń joǵary oryndary UBT nátıjesin esepke almaıdy, sondyqtan sheteldik oqýǵa túskisi keletin oqýshylar óz bilimin baǵalatý úshin dástúrli emtıhan tapsyrýdy qalaıdy. Sondyqtan UBT-ǵa daıyndyǵy az oqýshylar qalyp otyrady. Oblys ákiminiń orynbasary Marat Júndibaev: «Biz túlekterge baǵyt berý jóninen reseılik joǵary oqý oryndarynan utylyp qalamyz. Olar qańtardan bastap, mektepterdi aralap, oqýshylarmen áńgimelesedi.Al biz bul jumysty mamyr aıynda ǵana esimizge alamyz. Reseıge barmańdar dep aıtýǵa quqymyz joq, biraq biz balalarǵa bizdiń elimizde qandaı jaqsy oqý oryndary bar ekendigin aıtýymyz kerek», – dedi. Qostanaı memlekettik pedagogıkalyq ınstıtýtynyń rektory Qýat Baımyrzaevtyń aıtýynsha, endi ınstıtýtqa pedagogıkaǵa beıimi bar túlekterdi qabyldaý úshin, olar qosymsha emtıhan tapsyrady. Qazaqstannyń ózge óńirinen kelgen stýdentterdiń esebinen ınstıtýtta stýdentter sany 17-den 33 paıyzǵa deıin ósken. Sonymen qatar rektor qostanaılyq balalardyń Reseı oqý oryndaryna ketip jatqan úderisine de jurt nazaryn aýdartty. Qostanaı memlekettik pedagogıkalyq ınstıtýtynyń rektory Qýat Baımyrzaev: «Talapkerlerdiń reseılik oqý ornydaryna aǵylýynyń keri áseri bar. 2014 jyly shet el joǵary oqý ornydarynada oqyǵan 37 000 qazaqstandyq jastardyń 26 myńy Reseıde oqydy. Olardyń basym kópshiligi Reseı azamattyǵyn alyp, sonda jumysqa ornalasty», – dedi. Názıra Járimbetova. Derek, sýret: ng.kz