«Bı ǵalamatynyń» ǵajaby

Jaqynda «Astana Balet» teatry alǵash usynǵan «Bı ǵalamaty» baǵdarlamasy tabysty ótip, kórermen qaýym belgııalyq horeograf B.Amaranteniń «GALA» qoıylymyn zor yqylaspen tamashalady. Belgili ujymnyń bul jańa dúnıesiniń ereksheligi sol, oǵan zamanaýı horeografııalyq órnekter qosylǵan. Talǵampaz qaýym munyń bárin «ǵalamat» degen bir aýyz sózben baǵalady. Mýzykasyn A.Amar men B.Ga­farov jazǵan, horeograf N.Dmı­­trıevskıı qoıǵan «Álem» ba­letinen berilgen keń qu­lash­ty kúrdeli fragmentter jıylǵan ónersúıgish jurtty kóńildi jaýlap alar erekshe kúıge bólegeni anyq. Mundaǵy jarqyn shattyqqa toly bı qımyldary jandy eljireter erekshe syrly da sulý sazben kómkerildi. Bul kúni kórermenge tar­tylǵan taǵy bir syı – «GAIA» qoıylymynyń tusaýkeseri boldy. Bul rette zaldaǵy qaýym bıdi qoıǵan horeograf R.Ama­rante men mýzykasyn jazǵan sazger H.Tavares daryn­da­rynyń ǵalamatyna qol soq­ty desek te bolady. Ejikteı aıtsaq, belgııalyq áıgili horeograf Rıkardo Ama­ranteniń «GAIA» atty jańa týyndysy horeografııa tilimen jetkizilgen Jer sharynyń jylnamasy ispetti. Onyń maz­mun-maǵynasy óte tereń. Kórermen qaýym Kúndi aınalatyn Jer sharymyzdaǵy kúrdeli qubylystardyń syryna qanyǵady. Baǵzy zaman danyshpandary bizdiń álem tórt taǵan – Jer, Sý, Aýa jáne Otqa súıengen dep bilgen. Alaıda, Jer betindegi tirshilikti onsyz elestete almaıtyn taǵy bir taǵan bar, ol – О́simdikter álemi. Aǵash, kók maısa shóp, gúlder bolmasa ómirdiń sáni bar ma? Endeshe, osy bes taǵannyń árqaısysy Jer betindegi tirshilikti qamtamasyz etip turatyn kúrdeli júıeni quraıdy. Olardyń bári ózara qarym-qatynasqa túsip, birin-biri tolyqtyryp, baı ári sheksiz, darhan da ǵajaıyp Jer jánnatynda tirshilik etedi. Olaı bolsa R.Amarante bıiniń ǵalamaty astanalyq talǵampaz kórermenge osynaý ómirlik fılosofııany pash etti. Nazar QASYM.