Tarazdyń tátti halýasy-aı!

Elbasy N. Nazarbaev shaǵyn kásipkerlikke únemi qoldaý kór­setip keledi. «Ult Jospary – qa­zaqstandyq armanǵa bas­taı­tyn jol» maqalasynda Nursultan Ábishuly «Álem elderiniń tájirıbesi kórsetip otyr­ǵan­daı, tabysty jumys istep tur­ǵan ekonomıkanyń mańyzdy qaǵıdaty memlekettiń shaǵyn jáne orta kásipkerlikti qoldaýy, ony qorǵaýdyń tıisti deńgeıin qamtamasyz etý bolyp tabylady», – dep, bul salanyń mańyzdylyǵyn aıryqsha atap ótti. Tarazdyq kásipker Nurlan Ahanov 1998 jyldan bastap hal­ýa shyǵarýmen aınalysyp keledi. Dámi til úıiretin Nurlannyń óndirgen halýasyn búginde Jam­byl, Ońtústik Qazaqstan oblysy jáne Almaty qalasynyń turǵyndary tutynady. Jalpy, bylaıǵy jurt halýany tek shemishkeden jasalady dep oılaıdy. Biraq, bul tátti jeń­sik taǵamǵa kúnbaǵystan bólek júgeri sirnesi, qant jáne meıiz qosyndysy qosylady eken. Al kásipker halýa daıyndaýǵa qajetti qospalardyń bárine otandyq ónimderdi paıdalanatynyn aıtady. Mysaly, atalǵan kásiporyn kúnbaǵysty Jýaly, Merki, Shý jáne T.Rysqulov aýdanynyń sharýalarynan satyp alady. Sondaı-aq, qant pen meıizdi Tarazdan, al júgeri sirnesi irgemizdegi Almaty qalasynan jetkiziledi. – Jurt halýany daıyndap, tutynýshyǵa usynýdyń óte kúrdeli ekenin bile bermeıdi. Máselen, shemishkeni qabyǵynan tazalap, keptirýdiń ózi jumysshylarǵa edáýir kúsh túsiredi. Áıtse de, «she­­­girtkeden qoryqqan egin ekpeıdi» dep qarap otyrǵan joq­pyz. Mysaly, birneshe jyl buryn óndiriske ISO-9001-2000 halyqaralyq sapa menedjmenti júıesin engizdik. Sondaı-aq, ká­siporynǵa halyqaralyq «Halal» sapa standarty sertıfıkatyn aldyq. Budan bólek, ótken jyly Qytaıdan jańadan qural-jabdyq satyp ákelip ornatyp, óndiristi damytýǵa kúsh salyp otyrmyz. Atalǵan qural-jabdyqtyń ar­qasynda jylyna 150 tonna taýar óndirýge múmkindik aldyq, – deıdi Nurlan Shúkirjanuly. Qazirgi tańda «Ahanov» jeke kásipornynda 17 adam eki qolǵa bir kúrek taýyp, eńbek etip jatyr. Nurlan Shúkirjanulynyń aıtýyn­sha, olardyń ortasha jalaqysy 40-50 myń teńgeniń aınalasynda. Kásiporyn basshysy básekege qabiletti bolý úshin aldaǵy ýa­qytta odan ári shıraı túsý kerek ekenin aıtady. Sebebi, Qazaq eli Eýrazııalyq ekonomıkalyq odaqqa kirgeli beri básekelestik burynǵyǵa qaraǵanda áldeqaıda joǵarylaǵan. – Bizdiń bolashaqtaǵy jos­parymyz básekege tótep beretindeı ónim shyǵaryp, tyǵyryqtan shyǵý bolyp otyr. Ol úshin biz­ge halýanyń baǵasyn túsirip, ke­risinshe, onyń sapasyn arttyrý kerek dep oılaımyn. Onyń ústine halýa kúndelikti tutynatyn taýarlar sııaqty joǵary suranysqa ıe emes. Mysaly, oblysta 50 shujyq shyǵaratyn seh jumys jasaıdy eken. Al halýa shyǵaratyn nebári bir-aq seh bar. Kezinde bizben birge ıyq tirestirip, eki seh halýa óndirgen bolatyn. Alaıda, olar básekege tótep bere almaı, jabylyp qaldy. Biz atalǵan áriptesterimiz sııaqty naryqta ju­tylyp ketpes úshin, osy kezden bastap durys qadam jasaýymyz kerek, – deıdi kásipker Nurlan Ahanov. Oralhan DÁÝIT, «Egemen Qazaqstan». Jambyl oblysy.