Tarazda jastar teatry ashyldy

TARAZ. 17 aqpan. Taraz memlekettik pedagogıkalyq ınstıtýtynda «Jansaraı» jastar teatry ashyldy. Onyń akterleri atalǵan oqý ornynyń stýdentteri. Bul týraly TarMPI baspasóz qyzmeti habarlady. Teatr ónerpazdary Israıl Saparbaıdyń «Syǵan serenadasy» mýzykalyq dramasyn sahnalady. Bul – teatr repertýaryndaǵy alǵashqy  klassıkalyq shyǵarma. Áıgili Shámshiniń júrek shymyrlatar, sezim serpilter qudiretti ánderi árbir qazaqtyń aýzynda. Sol sulý ánder ómirge qalaı keldi? Jalpy Shámshiniń óz taǵdyry, óz mahabbaty týraly ne bilesiz? Eriksiz bıge jetelep mahabbatpen tebirenter «Syǵan serenadasy». Osy bir ándi oıatqan syǵan qyzy Izolda jaıly estigenińiz bar ma? Án mahabbaty Shámshi taǵdyryn toqaılastyrǵan Israıl Saparbaıdyń «Syǵan serenadasy» atty poetıkalyq dramasy sahnada osy turǵyda syr shertisedi. Áýenge toly drama áserge de toly. «Syǵan serenadasy» - teatr sahnasyndaǵy shoqtyǵy bıik týyndylardyń biri. Onyń óresi keń, qupııasy ashylmaǵan. Vals koroli áıgili Shámshi rýhyna baǵyshtalǵan bul týyndy sazgerdiń taǵdyryn beıneleıdi. Teatr rejıseri, Qazaqstan Respýblıkasynyń eńbek sińirgen ártisi Maıra Álimbetovanyń aıtýynsha, bolashaqta mahabbat pen dostyqtyń qanshalyqty qudiretti kúsh, uly sezim ekenin uǵyndyratyn hám jurtshylyqtyń kóńil tórinen oryn alǵan klassıkalyq qoıylymdar sahnalanbaq. «Teatr – bul máńgilik sezimge toly tutas bir ómir. Mahabbat pen óshpendilik, ómir men ólim, senim men úmit. Stýdentter úshin ol teatr óneriniń sıqyrly kúshine janasýǵa, túrli keıipkerlerdiń beınesin somdaýǵa túsinýge jol ashady. Bul teatr qoıylymdaryn kásibı mamandar emes, stýdentter  qoıady. Bul – jastardyń shyǵarmashylyǵyn shyńdaýǵa úlken sep bolmaq», dedi Taraz memlekettik pedagogıkalyq ınstıtýtynyń rektory Darııa Qojamjarova. Kelgen qonaqtar qoıylym sońynan úzdiksiz, uzaq ýaqyt qoshemet kórsetip, shapalaqtan shashý shashty. Stýdentterdiń ónerin tamashalaýǵa kelgen Jambyl oblys ákimdigi mádenıet basqarmasy bastyǵy Dúısen Byqybaev, Jambyl oblystyq qazaq drama teatrynyń dırektory Bolat Bekjan jáne ózge de qonaqtar qoıylymnyń jastarǵa berer tálim-tárbıesiniń qanshalyqty zor ekenin aıtyp, óz rızashylyqtaryn bildirdi. Qazirgi ýaqytta teatr stýdentteri «Aısha bıbi» atty tarıhı qoıylymǵa daıyndalýda. Oralhan Dáýit. Derek, sýret: egemen.kz