Arýlar Arabııada ne joǵaltty?

Sulýlyq shirkin, kózdiń qurty. Jaqsy buǵan súısinip qarasa, jaman kóziniń suǵyn qadaıdy. Sonan soń, qaraý jandar sulýlyqqa suranysy joǵary taýar retinde qaraıdy. Iá, tán saýdasy búgingi kúnde nán bızneske aınalǵan. Qaraǵandydaǵy jaǵa ustatqan oqıǵa osylaı dep aıtpasqa laj qaldyrmaıdy. Kenshiler astanasyndaǵy model agenttiginiń dırektory aı dese aýzy bar, kún dese kózi bar arýlardy apta saıyn top-tobymen Bahreın koroldigi men Birikken Arab Ámirligine jiberip otyrǵan. Arab elderine attanǵan qyzdardyń ishinde osaly joq eken. Shetinen qarasań kóz toımaıtyn kóriktiler kórinedi. Aralarynda kámelet jasyna tol­maǵandary da bar. Máselen, 15 jas­taǵy bir qyzǵa anasynyń ózi senimhat jazyp beripti. Shashy uzyn, aqyly qysqa bala da ol jaqta tek qana sýretke túsip, sán bıznesimen aınalysamyn degenge ımandaı sengen ǵoı... Endi bul qyzdar alystaǵy Arabııada ne joǵaltty dese­ńizshi?! Sóıtse, model bolýdy maqsat etken qyzdardy jat jerdegi nıeti teris qylmystyq top jezókshelikpen aınalysýǵa májbúrlep otyrǵan. Taıaýda shetelge qyzda­ry­myz­dy arbalap attandyryp otyrǵan 24 jastaǵy alaıaq qyz – model agenttigi dırektorynyń soty bas­taldy. Sot belgili sebepte­r­ge baılanysty, jabyq esik jaǵ­daıynda ótýde. Onda aıyptalýshy aıylyn jımaı, ózin aqtaýǵa tyrysyp jatyr. «Men eshkimdi de erkinen tys eshqaıda barýǵa májbúrlegen joqpyn. Qyzdardyń bári shetelge óz erikterimen ketti. Olar­dy ushaqqa eshkim de kúshtep otyr­ǵyz­­ǵan joq. Kelgen jerinde olar model bolýdy nemese jezókshe­lik joldy óz erikterimen tań­dady», – dep aıtqanynan qaıtpady. О́zi de kezinde talaı sán baı­qaýlaryna qatysyp, bul salanyń qýlyq-sumdyǵyna ábden tóselip alǵan kúdikti qyzǵa Qylmystyq kodekstiń 128-babynyń 3-tar­maq­shasy boıynsha «Adam saýdasy» qylmysy boıynsha aıyp taǵylǵan. Qaırat ÁBILDINOV, «Egemen Qazaqstan». QARAǴANDY.