Jastar qaýymdastyǵy quryldy

Jastar qashanda qoǵamnyń qýatty kúshi bolyp tabylady. Olardyń bastamashyldyǵy men jańashyldyǵy qaı istiń de ilgerileýine serpin bereri sózsiz. Qazir oblysymyzda 7 eriktiler toby turaqty jumys isteıdi. Olardyń qataryna 4000-ǵa tarta jas qamtylǵan. Jaqynda ótken óńir jastary­nyń alqaly jıynynda oblys ákimi Berdibek Saparbaev jastardyń qoǵamda alatyn ornyna aıryqsha toqtaldy. Ol elimizdiń árbir azamaty, sonyń ishinde árbir jasy da ózi ómir súretin qoǵamyna, memleketine qyzmet etýi, Elbasy Nursultan Nazarbaev «Qazaqstan jańa jahandyq naqty ahýalda: ósý, reformalar, damý» atty Joldaýynda aıtqandaı, jastarymyz bilimdi, eńbekqor, bastamashyl hám belsendi bolýǵa qazirden bastap daǵdylanýy tıis ekendigin atap ótti. Jastardy árdaıym «maǵan barlyq jaǵdaıdy jasap otyrǵan memleketime, Otanyma ne bere alamyn?» degen saýal tolǵantýy kerek degen oı mazalaýy kerek ekendigine nazar aýdardy. Aımaq basshysy jınalǵan jastar uıymdarynyń ókilderin aýyzbirshilik pen belsendilikke shaqyrdy. Basqosýda kolledj basshy­lary men jastar sóz alyp, erik­tiler uıymdary tarapynan at­qarylyp jatqan sharalardy baıandady. Qoǵamda salamatty ómir saltyn, qaıyrymdylyqty, otansúıgishtikti, aǵa býyn ókil­derine syılastyqpen qaraý­dy nasıhattaıtyn sharalar ótkizip turý týraly kreatıvti usynystarymen bólisti. Jıynda «Aqtóbe jastary» qaýymdastyǵyn qurý týraly sheshim qabyldandy. Al jańadan qurylǵan qaýym­dastyqtyń jetekshisi bolyp Islam Isenǵazıev bekitildi. Islam – elimizdiń ulttyq tarıhy men mádenıeti negizinde jas urpaqtyń rýhanı áleýetin qalyptastyrý maqsatynda qu­rylǵan «Effekt Aqtóbe» jobasyn uıymdastyrýshylardyń biri. Oblystaǵy barlyq jas­tar uıymdarynyń basyn qosatyn «Aqtóbe jastary» qaýym­das­tyǵyna alǵashqy kópshilikke arnalǵan sharasyn naýryz aıynan bastaý oılastyrylýda. Bıyl alǵash ret Memleket basshysy Nursultan Nazarbaevtyń Jarlyǵymen 1 naýryzda Alǵys aıtý kúni atap ótiledi. Qaýym­dastyqtyń alǵashqy sharasy osy ataýly kúnge arnalady dep kútilýde. Satybaldy SÁÝIRBAI, «Egemen Qazaqstan». Aqtóbe oblysy.