Úshinshi úmitker qujat ótkizdi

Almaly aýdandyq №1 okrýgtik saılaý komıssııasy qalalyq máslıhattyń depýtattyǵyna nurotandyq úmitker, belgili ǵalym Rahman Alshanovtyń úmitkerlik qujattaryn qabyldady. Saılaý komıssııasynyń tóraıymy Gúlnar Musaqulova №1 okrýg boıynsha buǵan deıin qujat tapsyrǵan eki úmitkerdiń zańdy túrde tirkelgenin aıtty. Olar – Qazaqstan Respýblıkasy Bılıard sporty federasııasynyń ókili Nursulý Emberdıeva men Qurmanǵazy atyndaǵy Qazaq ulttyq konservatorııasynyń kafed­ra meńgerýshisi Zere Shákárimova. Úshinshi bolyp qujat ótkizgen «Turan» ýnıversıtetiniń rektory Rahman Alshanovtan saılaýaldy talaptaryna sáıkes, ótinishi men tólqujatynyń jáne «Nur Otan» partııasynyń múshesi ekendigin rastaıtyn kýáliginiń kóshirmesi qabyldandy. – Endi úshinshi úmitkerimizdiń osy qujattaryna súıene otyryp, kóshi-qon polısııasy men bas prokýratýraǵa saılaý talaptaryna sáıkes suraý salamyz, – dedi Gúlnar Tólendiqyzy. – Taǵy bir eskeretin jaıt, ol is-áreketti elektrondy baılanys júıesimen oryndaýǵa bolmaıdy, tek qana óz qolymyzben alyp baryp, kózbe-kóz rastalǵan qujattar alamyz. О́z kezeginde sóz alǵan úmitker Rahman Alshanov: – Bizdiń Almaty – óte úlken megapolıs, munda búgingi tańda atqarylatyn is-sharýa óte kóp. Qalada tirkelgen mıllıonnan astam saılaýshynyń úshten biri – jastar. Jastardyń múddesi – bolashaqtyń múddesi. Qalalyq máslıhattyń saılaýyna osymen ekinshi ret qatynasyp otyrmyn. Bul joly da meniń kandıdatýramdy «Nur Otan» partııasy usyndy. Qarsylyq bildirmedim, – dedi. Úmitkerdiń qujattaryn ótkizý rásimine onyń senim bildirilgen adamdary men «Nur Otan» par­tııa­synyń ókilderi jáne BAQ ókilderi qatysty. Eske sala keter bir jaıt, Al­maty qalasy boıynsha búginge deıin qalalyq máslıhat depýtattyǵyna 37 kandıdat tirkeldi. Talǵat SÚIINBAI, «Egemen Qazaqstan». ALMATY.