AQSh bıligi Apple arqyly ár iPhone smartfonyn buzýǵa múmkindik almaq

ASTANA. 18 aqpan. AQSh Apple kompanııasy arqyly barlyq iPhone túrlerine tolyq kirýge qol jetkizbek. Bul týraly TASS aqparat agenttigine silteme jasaǵan egemen.kz tilshisi habarlady. AQSh bıligi Apple-dyń tek bir ǵana iPhone-yn buzýmen shektelip qalmaq emes, olar kompanııanyń osyndaı qurylǵylarynyń barlyǵyna tolyq kirýdi kózdep otyr. Mundaı pikirin AQSh arnaıy qyzmetiniń burynǵy qyzmetkeri Edvard Snoýden Twitter áleýmettik jelisindegi jeke paraqshasynda málimdegen. 16 aqpanda jarııalanǵan AQSh sotynyń sheshimine ol: «Bul sońǵy onjyldyqtaǵy tehnologııaǵa qatysty mańyzdy isterdiń biri», – dep túsinikteme beredi. Sot sheshimine sáıkes, Apple iPhone smartfonyn buzý úshin Federaldyq tergeý bıýrosyna (FBR) kómektesýge mindetti. Al bul smartfon AQSh-tyń Kalıfornııa shtatyndaǵy San-Bernardıno qalasynda múgedekter ortalyǵyna shabýyl jasaýǵa qatysyp, keıin kózi joıylǵan terrorıst Saıd Farýkke tıesili bolǵan. Esterińizde bolsa, ótken jyly 2 jeltoqsanda bolǵan terakt kezinde 14 adam qaza bolyp, 21-i aýyr jaraqattanǵan edi. Sot arnaıy qyzmet mamandary smartfonda ornatylǵan qorǵanys qurylǵysynan aınalyp ótý úshin Apple-di Federaldyq tergeý bıýrosyn tıisti baǵdarlamamen qamtamasyz etýdi mindettedi. Ereje boıynsha kompanııa Phone-daǵy málimetterdi shıfrlap qoıady. Oǵan kirý úshin qupııasózdi bilý shart. Sondaı-aq, qurylǵyda eger ony tym kóp buzýǵa talpynsa, barlyq aqparatty joıyp jiberetin qorǵanys fýnksııasy ornatylǵan. «Tergeý bıýrosy talap etip otyrǵan tehnologııalyq túrlendirý iPhone-nyń 5S nemese odan da joǵary modelderin jarty saǵatta buzýǵa múmkindik beredi», – deıdi bul jóninde Edvard Snoýden. Onyń oıynsha, «Halyq quqyqtary saqtalatynyn bilip, Apple-ǵa senim artady. Al, Federaldyq tergeý bıýrosy azamattardyń osy senimine selkeý túsiretin ózge álemdi jasamaqshy». Apple kompanııasynyń basshysy Tım Kýk Federaldyq tergeý bıýrosynyń talabyna kelispeıtindikterin málimdedi. Kompanııany AQSh-taǵy beldi quqyq qorǵaý uıymdarynyń biri – Amerıkalyq azamattardyń bostandyǵyn qorǵaý odaǵy (ACLU) qoldap otyr. «Úkimet tarapynan jasalǵan bul qadam – buryn-sońdy bolmaǵan jaıt, aqylǵa syımaıdy ári zańsyz», – dedi sóz ben tehnologııa bostandyqtaryna qatysty máselelerge mamandandyrylǵan odaq zańgeriniń biri Aleks Ebdo. Aıta keteıik, AQSh Ulttyq qaýipsizdik agenttiginiń ǵalamdyq ańdý baǵdarlamasy týraly málimetterdi áshkerelegen Edvard Snoýden 2013 jyly Reseıden ýaqytsha baspana alǵan bolatyn. О́z elinde oǵan qupııa aqparattardy taratqany úshin aıyp taǵylǵan. Osyǵan oraı Snoýdendi otanynda uzaq mezimdi túrme jazasy kútip tur. Elaman Qońyr. Derek: TASS. Sýret: topinfopost.com.