Aqtóbede ótken jyly salyq túsimderi asyra oryndaldy

AQTО́BE. 18 aqpan. Aqtóbe oblysynda ótken jyldyń qorytyndysy boıynsha bıýdjetke 319 mıllıard teńgeden astam qarjy tústi. Bul týraly egemen.kz tilshisi habarlady. Jyl qorytyndysyna arnalǵan jıynda Aqtóbe oblysy boıynsha memlekettik kiris departamentiniń basshysy Talǵat Mamaev memlekettik jáne respýblıkalyq bıýdjetter kiristeri boıynsha jospar tıisinshe 11,7 paıyz jáne 16,9 paıyzǵa asyra oryndalǵanyn aıtty. Jergilikti bıýdjet jospary 105,3 paıyzǵa oryndaldy, sonyń nátıjesinde jergilikti bıýdjetke jospardan tys 4,3 mıllıard teńgeden astam qarjy tústi. Al Aqtóbe qalasy bıýdjetine salyq túsiminiń tómendeýi baıqalǵany atap ótildi. Jıyn barysynda mekeme tarapynan kórsetiletin memlekettik qyzmetterdiń sapasyn arttyrý máseleleri de qozǵaldy. Dálirek aıtar bolsaq, memlekettik kirister jónindegi departament azamattarǵa salyq boıynsha qaryzdarynyń bar ekendigi jóninde habarlama jiberip turatyn Biryńǵaı esepteý ortalyǵyn ashýdy oılastyrýda. «Búgingi kúni salyq týraly habarlamalar halyqqa qolmen nemese poshta arqyly taratylady. Habarlamalardyń meken jaılarǵa jetpeıtin kezderi de kezdesedi. Keı jaǵdaılarda azamattar salyq boıynsha qaryzdarynyń bar ekendigin sotta estip jatady. Bul máseleni Biryńǵaı esepteý ortalyǵyn ashý arqyly sheshýdi josparlap otyrmyz», – deıdi Talǵat Mamaev. Sonymen qatar, ınternet-resýrsyn qurý týraly usynys ta aıtyldy. Salyq tóleýshiler ol resýrstan tóleýi tıis salyǵy, onyń mólsheri men ósimi týraly málimetterdi ala alady. Mundaı resýrs arqyly kez-kelgen ýaqytta salyq jónindegi qaryzdar týraly málimetterdi alyp qana qoımaı, onlaın rejimi boıynsha qaryzdardy tóleýge de bolady. Satybaldy Sáýirbaı. Derek: egemen.kz. Sýret: strategy2050.kz.