Neva ústindegi samǵaý

«Astana Opera» memlekettik opera jáne balet teatrynyń sımfonııalyq orkestri Marııa teatrynyń Konsert zalynda álemge áıgili maestro, Reseıdiń halyq ártisi Valerıı Gergıevtiń dırıjerligimen óner kórsetti. Bul – teatr trýppasynyń Sankt-Peterbýrgke alǵashqy sapary emes, 2014 jylǵy naýryzda ártister Marııa teatrynyń eski jáne jańa sahnalarynda Dj.Verdıdiń «Attıla» jáne M.Tólebaevtyń «Birjan-Sara» operalaryn usynǵan bolatyn. Sonymen birge, balet trýppasy eń úzdik horeografııalyq nómirler men balet úzindilerin tartý etken edi. Shynyn aıtqanda, Reseıdiń rýhanı astanasyn klassıkalyq mýzykanyń jaýhar týyndylarymen de, oryndaýshylyq qyrymen de tańǵaldyrý qıyn. Alaıda, Qazaqstannyń astanalyq orkestri talǵampaz Peterbýrg jurtshylyǵyna mazmuny erekshe baǵdarlama daıyndady. Munda qazaq, orys jáne batys eýropalyq kompozıtorlardan, atap aıt­qan­da, Erkeǵalı Rahmadıevtiń «Qu­dasha dýman» sımfonııalyq kúıi, T.Qajyǵalıevtiń «Dala ańyzy» baletinen sıýıta, Iаn Sıbe­lı­ýstiń orkestr men skrıpkaǵa ar­nalǵan konserti jáne Sergeı Pro­kofevtiń «Romeo men Djýl­etta» baletinen eki sıýıta bar. Al Sıbelıýs konsertinen qazaq­standyq belgili skrıpkashy Erjan Qulybaev jeke partııa oryndady. Bul rette «Astana Opera» men Marııa teatrynyń basshyla­ry eki jaqty mádenı qarym-qaty­nas­tardy odan ary damytýǵa meı­linshe múddeli ekendikterin aıtty. Eske sala ketý kerek, qazaq­stan­dyq mýzykanttardy reseılikter úsh kún boıy anshlagpen qarsy alǵan sondaǵy shat-shadyman sátter tarıhı oqıǵa desek te, jas orkestrdiń az ýaqyttaǵy munshama iri jetistigi ujymnyń shyǵarmashylyq ósip-órkendeýiniń naqty dáleli ispetti. Elordalyq teatrdyń tabysy qala qonaqtary men turǵyndarynyń ǵana emes, reseılik BAQ ókilderiniń aıryqsha nazaryna ilikkeni bólek áńgime. Olar týraly «Reseı gazetinde»: «Solısterdi basyp tastaýdy emes, qoldaýdy maqsat tutatyn or­kestr amortızasııalanǵan erek­she­ligimen, jumsaqtyǵymen, jı­naqylyǵymen, naqtylyǵymen jáne sazdylyǵymen qaıran qaldyrdy. Aldymyzda – bıikterdi maqsat etken naǵyz passıonarlar turǵany aıdan anyq», – dep baǵa berildi. («RG».09.03.2014). – Quramynda 95 adamy bar orkestrimiz, mine, taǵy da Marııa teatry sahnasynda óner kórsetip, óte qýanyshty jaıtqa kenelip qaıtqan jaıymyz bar, – dedi «Astana Opera» MOBT dırektory Tóleýbek Álpıev jýrnalısterge bergen suhbatynda. –Sebebi, álemdik deńgeıdegi sahnalarda óner kórsetý arqyly ujym jańadan tájirıbe jınaqtaıdy, óz qarymyńdy ózgelermen salystyryp baǵalaýǵa múmkindik týady, eń bastysy, tól mýzykamyz ben oryndaýshylyq sheberligimizdi tanystyrý men nasıhattaýǵa jol ashady. Gastroldik konserttiń Valerıı Ábisalulynyń dırı­jer­ligimen ótkenin basa aıtyp ótkim keledi, nege deseńiz maestronyń ózge orkestrlermen óner kórsetýi óte sırek, ádette, ony jurt tek óz ujymymen bóle-jarmaıdy. Soǵan oraı V.Gergıevtiń baǵdarlama boıynsha qazaq, Eýropa mýzykalaryn qatar oryndaýǵa keliskeni bizdi qýantty. Reseılik maestro «Astana Opera» teatrymen 2014 jyldan beri tyǵyz shyǵarmashylyq baılanysta jumys istep keledi. Sondaı-aq, 4-5 qazanda Valerıı Gergıevtiń jetekshiligimen Marııa teatrynyń trýppasy osyǵan jaýap retinde Astanada Rıhard Vagnerdiń áıgili «Nıbelýng saqınasy» tetralogııa­synan operalar qoıǵanyn hám qazaqstandyq kórermen olardy zor yqylaspen qabyl alǵanyn atap ótken abzal. Qarshyǵa KÚLEN.