«Barys» sońǵy oıynda «Avangardty» jeńgenimen, pleı-offqa óte almady

ASTANA. 18 aqpan. Búgin Qurlyqtyq hokkeı lıgasynyń turaqty chempıonaty sheńberinde Astananyń «Barysy» bıylǵy maýsymdaǵy sońǵy kezdesýin ótkizdi. Ombyda Shyǵys konferensııasynyń kóshbasshysy, jergilikti «Avangardpen» synǵa túsken elordalyqtar oıyn sońyndaǵy býllıt arqyly jeńiske jetti. Bul týraly egemen.kz tilshisi habarlady. Negizgi ýaqyt 2:2 esebimen teń aıaqtalyp, býllıtter serııasynda bizdiń komanda basymdyq tanytty. Alaıda, bul basymdyq «Barystyń» týrnırdiń pleı-off satysyna joldama alýyna jetkiliksiz boldy. Osylaısha, astanalyqtar Qurlyqtyq hokkeı lıgasyna qatysqaly beri alǵash ret pleı-offqa óte almady. Sebebi, osy jeńisten keıin Andreı Nazarovtyń komandasy qorjynyndaǵy upaıyn 85-ke jetkizgenimen, basty básekelesi – Nıjnekamskiniń «Neftehımıgin» basyp oza almady. «Avangardpen» bolǵan oıynda aıdyn ıeleri esep ashty. Atap aıtqanda, 9-mınýtta Alekseı Glýhov mergendigimen kózge tússe, 14-mınýtta Artýr Laýta esepti eseledi. Úziliske 3 mınýt qalǵanda «Barys» sapynan Roman Starchenko gol soǵyp, qonaqtar bir goldyń qarymtasyn qaıtardy. Al ekinshi kezeńde, naqty aıtsaq, 32-mınýtta Brendon Bochenskı qaqpany dál kózdep, tarazy basyn teńestirdi. Overtaımda birin-biri ala almaǵan qarsylastar býllıtter serııasyna júgindi. Bul synda «Barystyń» joly boldy. Astanalyqtar maýsymdy Shyǵys konferensııasynyń týrnır kestesinde 9-orynmen aıaqtaǵanyn atap ótken jón. Elaman Qońyr. Derek: egemen.kz. Sýret: hawk.ru.