«Rola-7» ónimine suranys joǵary

Baızaq aýdany, Qyzyl juldyz aýylynyń mańyndaǵy «Rola-7» jaýapkershiligi shekteýli se­riktestiginiń qurylǵanyna 8 jylǵa jýyqtady. Áýeli munda bir ǵana «Chabres» jaıma sehy jumys istedi. Biraq, kásiporyn basshysy Tursynbek Nurbaevtyń josparlary óte kóp bolatyn. Arada eki jyl ótkende ekinshi jaıma sehy ashyldy. 2011 jyly qurǵaq kespe jasaıtyn úshinshi seh óz jumysyn bastady. Bul kezde munda jumysshylar sany da arta tústi. 2012 jyly kásiporynǵa ónimderi halyqaralyq «Halal» standart talabyna saı ekendigin aıǵaqtaıtyn arnaıy kýálik berildi. Jumys durys jolǵa qoıyldy. Kásiporynnyń sapaly ónimderine suranys ulǵaıdy. «Rola-7» kásiporny taýar ón­dirýshiler arasynda «Qazaqstan kóshbasshysy – 2013» baıqaýynyń jeńimpazy atandy. 2014 jyly taýar óndirýshilerdiń respýblıka­lyq «Paryz» baıqaýynda «Úzdik ujym­dyq kelisim» atalymy bo­ıynsha jeńimpaz dep tanylǵany kásiporynnyń júıeli jumysynyń jemisi. «Paryz» baıqaýynyń dıplomyn ««Rola-7» jaýapkershiligi shekteýli seriktestiginiń dırektory T.Nurbaev Elbasynyń qolynan alyp qaıtty. Bul kásiporynda Parlament Májilisiniń depýtattary da bolyp, jumys barysyna, eńbekkerge degen qurmetke kóńilderi tolǵan eken. Bul kúnde «Rola-7» ónimderi Astana, Almaty qalalaryna jáne birneshe oblystarǵa jóneltiledi. Úlken suranysqa ıe. Munda makaron óniminiń 20 túri shyǵarylady. Munda óndirilgen ónim Reseı, Ýkraına, Belorýssııa elderindegi ónimderden artyq bolmasa, kem emes. Kásiporynda 18 avtokólik turaqty jumys istep tur. Jumysshylar men kásiporyn basshylyǵy arasynda jasalǵan kelisimshart bar. Keıingi jyldary jumysshylar sany úsh esege ulǵaıypty. Munda eńbek etýshilerdiń jalaqylary da kóńilden shyǵady. – Eń bastysy, 150 adamdy jumyspen qamtyp otyrmyz. Byltyr jaımanyń jyldam daıyndalatyn túri boıynsha taǵy bir seh ashtyq. Sońǵy jyldary jumysshylardyń jalaqysyn taǵy 10 paıyzǵa kó­beıt­tik. Munyń bári óńirdiń ekonomıkasynyń órkendeýine septigin tıgizetinin túsinemiz. Aldaǵy ýaqytta ónimderimizdi syrt elderge de shyǵarýymyz múmkin. Munda jumysshylarymyzǵa qajetti jaǵdaıdyń barlyǵy ja­salǵan. Tártipti qadaǵalaý, ju­mys belsendiligin nazarda ustaý maqsatymen beınebaqylaý qo­ıylǵan. Ujym eńbekkerleriniń jumysy qashanda baǵalanyp otyr, – deıdi kásiporyn basshysy. Kásiporynnyń sehtaryn aralap kórdik. Jumysshylar eńbek kórigin qyzdyrýda. Olardyń júzderinen kásiporynnyń bolashaǵyna degen úlken senimdi baıqadyq. Bul jaýapkershiligi shekteýli seriktestik jylyna shamamen 9-10 mıllıon teńge taza tabys taýyp otyr. Memleket qoldaýyna súıenip, istiń kózin tapqandy tabys ózi izdep keletinine taǵy kózimiz jetti. Eset DOSALY, jýrnalıst.  Jambyl oblysy, Baızaq aýdany. Sýretti túsirgen Aqádil RYSMAHAN.