Qashanda qatarda

Keshe Qazaqstan Kommýnıstik halyq partııasy aldaǵy Parlament Májilisi saılaýyna daıyndyq barysy týraly brıfıng ótkizdi. Aldymen sóz alǵan Qazaqstan Kommýnıstik halyq partııasy Or­talyq komıtetiniń hatshysy Tur­ǵyn Syzdyqov aldaǵy saıası doda­ǵa ázirliktiń barysy jóninde áńgi­meledi. «Partııa Parlament Máji­lisi men máslıhattar saılaýlaryna daıyndyq jumystaryn oıdaǵydaı ótkizip jatyr. Saılaý úderisterin uıymdastyrý jáne basqarý úshin ortalyq jáne oblystyq saılaýaldy shtabtar qurylyp, olardy elektorattyq naýqandarda áb­den shyńdalǵan, synnan ótken táji­rıbeli mamandar basqarady. Parlament Májilisi depýtat­tyǵyna partııanyń kezekten tys H sezinde aıqyndalǵan 22 úmitker Ortalyq saılaý komıssııasy tarapynan tirkeýden ótti. Ortalyq saılaý komıssııasynda ótkizilgen jerebege sáıkes, jasyryn daýys berý bıýlleteninde alty partııanyń arasynda Qazaqstan Kommýnıstik halyq partııasy ekinshi bolyp jazýly tur», dedi T.Syzdyqov. Kommýnıster Parlament Máji­lisine ǵana emes, aýdandyq, qalalyq jáne oblystyq máslıhattarǵa da óz úmitkerlerin usynýda belsendi ju­mys júrgizip jatqan kórinedi. Qazirge deıin qarjylyq jáne basqalaı máselelerdi eńserip, saı­laý komıssııalarynda 31 kom­mý­nıst-úmitker tirkeýden ótken. «Biz beıbitshilik, elimizdegi turaqtylyq úshin, kóp ultty jáne kóp ­konfessııaly Otanymyzdyń táýel­sizdigi men aýmaqtyq tutas­ty­­ǵynyń saqtalýy úshin kúrese­miz. Árbir adam óziniń etken eń­begine qaraı baǵalanatyn Jal­p­yǵa Ortaq Eńbek Qoǵamyn qalyp­tas­ty­rýdy qoldaımyz. Bizdi aldy­myz­da úlken ister kútip tur. Biz oǵan daı­ynbyz», dep túıindedi sózin T.Syzdyqov. Al QKHP respýblıkalyq saılaý­aldy shtabynyń jetekshisi Aı­qyn Qońyrov partııanyń bel­sen­dileri saılaýǵa daıyndyq ju­mys­taryn joǵary deńgeıde júr­giz­genin atap ótti. «Ortalyq saılaý komıssııasynda elimizdiń bedeldi kommýnısteri engen partııalyq tizim tirkeldi. Olar tekseristen ótti jáne tıis­ti talapqa saı bolyp shyqty. Son­daı-aq, aýmaqtyq saılaý komıssııa­laryna partııanyń senimdi ókil­deriniń tizimi tapsyrylyp, olar­dyń da saılaý zańnamasynyń talap­taryna laıyq ekendigi jónin­de sheshim qabyldandy», dedi A.Qońyrov. QKHP respýblıkalyq saılaý­aldy shtaby jetekshisiniń pikirin­she, úgit-nasıhat toptary qurylyp, orta­lyqta jáne jergilikti jerlerde uıymdastyrý jospary beki­ti­lipti. Qazirgi ýaqytta partııa saıası dodaǵa úkilep qosqan úmitkerlerdiń aımaqtardaǵy saılaýshylarmen kezdesý kestesi jasalý ústinde kórinedi. Úgit-nasıhat jumystarynyń vızýaldy jobasy bekitýge joldanyp, aýdıo, vıdeorolıkter ázirlengen. Partııanyń saılaýaldy shtaby jetekshisiniń pikirinshe, kom­mý­nısterdiń aldaǵy saıası naý­qanǵa ázirligi kúshti. «Bizdiń partııa sapaly úgit-nasıhat ju­mystaryn júrgizýge saqadaı saı. Biz partııanyń saılaýaldy baǵ­darlamasyndaǵy kommýnısterdiń usta­nymdary durys ekendigine sene­tin óz jaqtastarymyzdy jerge qaratpaımyz», dedi erekshe senimmen Aıqyn Oıratuly. QKHP Saıası keńesiniń múshesi Galına Baımahanova óz sózinde qazaqstandyq kommýnısterdiń baı­yrǵy ıdeologııadan alshaq­ta­maı­tynyn ańǵartty. «Bizdiń partııa ıdeologııalyq baǵyttaǵy partııa bolyp tabylady. Bizdiń saılaýaldy tuǵyrnamamyz partııamyzdyń H kezekten tys sezinde bekitildi. Negizgi basymdyqtar osy saılaý­aldy baǵdarlamamyzda qaras­tyrylǵan. Jahandaný kezeńinde, qazirgideı kúrdeli álemde biz básekege qabiletti bolýymyz qajet, sonda ǵana óz táýelsizdigimizdi nyǵaıta alamyz. Al jer – kim qadirin biledi, eńbek etedi, ónim alady – sonyń ıeliginde bolýy tıis», dedi Galına Aleksandrovna. «Aımaqtyq bólimsheler jer­gi­likti jerlerde úgit-nasıhat naý­qanyn ótkizýge daıyndyǵy týraly Ortalyq komıtet aldynda esep berdi. Osy esep berý kezinde QKHP OK aldaǵy kózdelgen maqsattardy tabysty júzege asyratyn tıesili uıymdastyrý jáne kadr áleýetine ıe ekendigi belgili boldy», dedi QKHP Saıası keńesiniń múshesi Vıktor Smırnov óz sózinde. Smırnovtyń aıtýynsha, jahan­daný dáýirinde batystyń kapıta­lıstik ıdeologııasynyń zııandy jaqtary kóp. Al Qazaqstannyń Kommýnıstik halyq partııasy mark­­­sızm men lenınızmniń qoldan­baly ekonomıkalyq zańdary­na súıene otyryp, qazirgi daǵdar­ys­ty ashkózdiktiń saldary dep túsi­netinin jetkizdi. Kommýnızm ıdeologııasymen qarýlanǵan qazaqstandyq kommýnıster qashanǵy dástúrge sáıkes «bárine daıyn» ekendigin brıfıng sátinde osylaısha taǵy bir márte málimdedi. Qalaı bolǵanda da, keshegi keńestik qoǵamnyń temirqazyǵyna aınalǵan ıdeo­logııany saılaýshylardyń qan­sha­lyqty jaqtaıtyndyǵyna 20 naý­ryzda kýá bolamyz. Ázirshe T.Syzdyqov bastaǵan partııa saı­laý­shylardyń qoldaıtynyna bek senimdi. Ǵabıt ISKENDERULY, «Egemen Qazaqstan».