AQSh-tyń belgili jazýshysy Harper Lı qaıtys boldy

ASTANA. 20 aqpan. AQSh-tyń belgili jazýshysy, «Saıqymazaqtyń kózin joıý» (To kill a mockingbird), «Kúzetshini taǵaıynda» (Go set a watchman) syndy kitaptardyń avtory Harper Lı 89 jasynda dúnıeden ótti. Bul týraly TASS aqparat agenttigine silteme jasaǵan egemen.kz tilshisi habarlady. Jazýshynyń qaıtys bolǵany týraly alǵash bolyp, Alabama shtatyna qarasty Monrovıll qalasyndaǵy Book Shoppe kitap dúkeniniń resmı saıty habarlady. Sondaı-aq, bul aqparatty qala ákimi de rastady. «Saıqymazaqtyń kózin joıý» týyndysy 1960 jyly shyqqan. Kitapta AQSh-tyń ońtústiginde ornalasqan shaǵyn qalashyqtaǵy násilshildik, eskilik uǵymnyń qalyptasyp ketýi jaıly jazylǵan. Osydan soń, 55 jyl boıy kitap jazbasa da, tanymal jazýshylardyń biri sanaldy. 2015 jyly Harper Lıdiń «Kúzetshini taǵaıynda» kitaby jaryqqa shyǵady. Bir qyzyǵy bul roman «Saıqymazaqtyń kózin joıý» týyndysy basylyp shyqqanǵa deıin jazylyp qoıǵan ári osy kitaptyń jalǵasy retinde jazyldy. 1961 jyly Harper Lı ádebıet salasyndaǵy eńbegi úshin Pýlıtser syılyǵyn alady. AQSh-tyń prezıdenti Kishi Djordj Býsh prezıdent medalimen, al onyń izbasary Barak Obama ádebıetke qosqan úlesi úshin ulttyq medalmen marapattaǵan. Ol 1926 jyly 28 sáýir kúni Monrovıll qalasynda dúnıege kelgen. 1947 jyly Alabama ýnıversıtetindegi zań salasy boıynsha oqýyn aıaqtamastan, Nıý-Iork qalasyna ádebıet baǵytyn qolǵa alý úshin kóship ketedi. Alaıda «Saıqymazaqtyń kózin joıý» kitaby jarııalanbas buryn týǵan jerine qaıta kóship kelip, ómiriniń sońyna deıin Monrovılde ómir súrgen. Aıan Ábdýálı. Derek: TASS. Sýret: bbc.com.