ASTANA. 20 aqpan. Germanııanyń Dıýsseldorf qalasynda ótip jatqan dzıýdodan «Grand Prix» týrnıriniń birinshi jarys kúni eki qazaqstandyq dzıýdoshy júldeger atandy. Atap aıtqanda, 60 kılo salmaq dárejesinde beldesken Eldos Smetov pen áıelder arasynda 48 kıloda baq synaǵan Galbadrah Otgonsegseg kúmis medaldi moıyndaryna taqty. Bul týraly Qazaqstan dzıýdo federasııasynyń baspasóz qyzmetini silteme jasaǵan egemen.kz tilshisi habarlady.
Eldos Smetov óz tobynda lıtvalyq Andreı Klokovty, Mońǵolııa ókili Sogtbaatar Sendochırdi jáne reseılik Beslan Mýdranovty jeńdi. Jartylaı fınalda ol Túrkııa palýany Beker Ozlýǵa san soqtyrdy. Al sheshýshi kezdesýde 60 kılo salmaq dárejesinde álem reıtınginde kósh bastap turǵan ońtústikkoreıalyq Kım Von Djımen kezdesti. Nátıjesinde Eldos qarsylasyna ese jiberip, kúmis júldeni qanjyǵasyna baılady.
О́z kezeginde Galbadrah Otgonsegseg aldymen týnıstik Saodı Olfany, odan keıin kilem ıesi Menz Katrınany jáne óziniń basty qarsylasy esepteletin monǵol qyzy Mýnhbat Ýransegsegti jeńdi. Fınalǵa joldama alý úshin kýbalyq Mestre Alvares Daıarısten basym túsken ol sońǵy kezdesýinde Ońtústik Koreıanyń ókili Djeong Bo Keongpen kúsh synasty. Galbadrah Otgonsegseg byltyr Astanada ótken álem birinshiliginde alǵashqy kezdesýinde-aq osy sportshydan jeńilgen bolatyn. Bul joly sońǵy sátke deıin qarsylasyp baqqanymen, qosymsha ýaqytta qarsylasyna bir eskertýmen jol berip qoıdy.
Aıta keteıik, jarysqa elimizdiń ulttyq komandasynyń birinshi quramy qatysyp jatyr. Alaıda, Maksım Rakov jaraqatyna baılanysty baıraqty básekede baǵyn synaı almaıtyn boldy. Týrnırge 86 eldiń 546 sportshysy qatysýda. Jarys nátıjesi boıynsha birinshi oryn alǵan dzıýdoshy 300, ekinshi oryn ıegeri 180, «qolaǵa» qol jetkizgen balýan 120 upaıǵa ıe bolady. Sonymen qatar, besinshi orynǵa turaqtaǵan sportshy 60, al jetinshi orynǵa jetken palýan 48 upaı alady.
Elaman Qońyr.
Derek, sýret: Qazaqstan dzıýdo federasııasynyń baspasóz qyzmeti.
