Aýyl – sarqylmas bulaǵymyz

Semeı qalasyndaǵy Abaıdyń memlekettik qoryq-murajaıynda «Aýyl» halyqtyq-demokratııalyq patrıottyq partııasynyń saılaýaldy shtaby aqyn, jazýshy, óner, mádenıet ókilderiniń qatysýymen arnaıy aksııa ótkizdi. Aksııaǵa qatysýshylar eń aldymen murajaıdyń aldynda ornalasqan Abaı eskertkishine gúl shoqtaryn qoıyp, aqyn rýhyna taǵzym etti. Shara barysynda «Aýyl» partııasynyń tóraǵasy Álı Bektaev: – El Prezıdenti Nursultan Nazarbaev halyqqa «Máńgilik El» ulttyq ıdeıasyn jarııa etti. Osy turǵyda biz aýyldy mádenı tetikti saqtap qalýǵa qabiletti moraldyq jáne adamgershilik dástúrdiń ózegi dep tanımyz. Aýyl bizdiń dástúrli qundylyqtarymyzdyń qaınar kózi, túp-tamyry, sarqylmas bulaǵy! – dedi. – «Aýyl» partııasynyń basty maqsaty – halqymyzdyń dástúrli qundylyqtaryn damytý, Otanymyz Qazaqstannyń táýelsizdigin baıandy etý bolyp tabylmaq, – dedi partııa múshesi, belgili jazýshy, Memlekettik syılyqtyń laýreaty Álibek Asqarov. – Qazaqtyń túp-tamyry aýylda. «Aýyl – altyn besigimiz» deıtinimiz de sondyqtan. Búginde halyqtyń negizgi bóligi qalada turǵanymen, Qazaqstandy aýylsyz eles­tetý múmkin emes. Partııamyzdyń basty qaǵıdasy da agrarlyq sektordyń serpindi jumys isteýine jaǵdaı jasaý. Partııa Prezıdenttiń strategııasyn, syndarly demokratııany, qoǵam men mem­lekettiń saıasatyn jaqtaıdy. Par­tııa aýyl sharýashylyǵynyń joǵa­ry qarqynmen jan-jaqty damýyn qol­daıdy, osyǵan atsalysady. – Ekonomıkadaǵy oń ózgerister eń aldymen aýyldyqtardyń áleýmettik jaǵdaıynan, turmys kúıinen kórinis tabýy tıis, –dedi aqyn Tynyshtyqbek Ábdikákim. – Memleket qazynasyna mol tabys túsirip jatqan aýyl sharýa­shylyǵynyń ónimderi árqashan mańyzdy. Mal ónimderiniń barlyǵy aýylda óndiriledi. Qazaq malynyń eti sapaly emes dep kim aıtady? Olaı bolsa, óz elimizdi ózimizden shyǵatyn ónimdermen tolyq qamtamasyz etýimiz kerek. Aýyl jastaryna bıznesterin ashýǵa jaǵdaı jasaýymyz kerek. Budan biraz buryn «Dıplommen – aýylǵa!» jobasy qolǵa alynyp, kóptegen jas mamandar aýylǵa baryp, pátermen qamtylyp, eńbek ete bastady. Aýylǵa serpin beretin osyndaı baǵdarlamalar kerek-aq. Jıyn barysynda sóz alǵan qo­ǵam qaıratkeri, ǵalym, ekonomıka ǵy­lym­darynyń doktory, profes­sor, Qazaq­stan ınnovasııalyq ýnıver­sı­tetiniń prezıdenti Nádirbek Ápsa­lıamov bylaı dedi: – Biz aýyl jastarynyń sapaly bilim alýyna qol jetkizýimiz kerek. Aýyldaǵy mektepterdiń materıaldyq-tehnıkalyq bazasy qaladaǵylarmen teńdes bolýy tıis. Aýyldardy taza sýmen qamtamasyz etý baǵdarlamasynyń oryndalýyn qadaǵalaý qajet. Aýyldaǵy turmysy tómen otbasylardy eńbekke ornalastyryp, olardyń qatarǵa qosylyp ketýine atsalysý kerek. «Aýyl» partııasynyń osy baǵyttaǵy is-áreketterin qoldaıtyn azamattar qa­tarynyń da kóp bolatynyna senim bildiremiz. Elbasymyzdyń Joldaýynda atalǵan barlyq mindettemelerdi birlese otyryp, oıdaǵydaı sheshetindigimizge úmitimiz zor. Qazaqstan eýrazııalyq strategııalyq jaǵdaıyn paıdalana otyryp, bul ǵasyrda álemdik qoǵamdastyqta óziniń laıyqty ornyn alady dep oılaımyz. Búginde agroónerkásip kesheni elimizdi ındýstrııalandyrýdyń ózegi bolýǵa qabiletti. Bıdaı, maqta, jemis-jıdek ósirý, óndirý arqyly ishki naryqty qamtamasyz etýge múmkindik mol. Buǵan túbegeıli qoldaý qajet. Aýyl sharýashylyǵyn mem­lekettik qoldaý deńgeıi álemniń aldyńǵy qatarly memleketterimen birdeı deńgeıde bolǵany durys. Jıynda «Aýyl» partııasynyń músheleri men jaqtastary búgingi aýyl sharýashylyǵynyń ózekti máselelerin keńinen sóz etti. Jıyn sońynda Semeı óńiriniń óner maıtalmandary aýyl taqyrybyna arnalǵan jyr-óleńderin jurtshylyq nazaryna usyndy. Raýshan NUǴMANBEKOVA, jýrnalıst. SEMEI.