Naýqan aksııamen bastaldy

Partııa músheleri sheteldik ónerdiń, ásirese, kınoındýstrııada «Batystyń mádenıetsizdigi» óreskel qy­lyqtar arqyly ózin ózi áshkerelep keletinin biraýyzdan jarııa etti. Sol sebepti de Esentaı ózeniniń jaǵasyna jınalǵan partııanyń jas tolqyn belsendileri taýdaı etip úıilgen sheteldik kınofılmder jazylǵan beınekassetalardy qyzyl traktordyń dońǵalaǵymen aıaýsyz taptap, ózderin de tanyta túsýdiń pıar-aksııasyn jasady. Aksııa ústinde «Batys máde­nıetsizdigi» búgingi jas urpaqtyń tárbıesine keri áserin tıgizip otyrǵany, jastardyń úlkendi syılaý, jańaǵa talpyný, patrıotızm sekildi dástúrlerden aıyrylyp qalǵany týraly keıistikpen aıtyldy. Aksııanyń basy-qasynda partııa belsendisi, belgili tanymal qoǵam qaıratkeri Jambyl Ahmetbekov jáne basqalary júrdi. Qazaqstan Kompartııasy jańa saılanatyn Parlament Májilisi músheleriniń qataryna aldyn ala óz belsendileriniń tizimin engizdi. Olardyń qatarynda Parlament Májilisiniń birneshe dúrkin depýtaty bolǵan Vladıslav Kosarevtiń partııalyq jaqtastary – Jambyl Ahmetbekov pen Aıqyn Qońyrov, ótken jylǵy Prezıdent saılaýyna qatysqan Turǵyn Syzdyqov, Parlament Májilisiniń sońǵy shaqyrylymynyń depýtattary Tursynbek О́mirzaqov, Galına Baımahanova, Borıs Sorokın bar. Sol kúni kommýnısterdiń bir shoǵyry «QazTransGaz О́nimderi» JShS eńbek ujymymen birlesip, partııanyń saılaýaldy baǵdarlamasyn talqylady. Sondaı-aq, Almaty kommýnısteri saılaý naýqany bastalǵan osy kúni kommýnıstik ıdeologııanyń kósemi Lenınniń saıabaqtaǵy eskertkishine gúl shoqtaryn qoıýdy da umytpady. Al keshe Astanada QKHP atynan depýtattyqqa kandıdattar «Tu­ran-Profı» akademııasynyń oqytý­shy­larymen kezdesti. Kommýnıster bul aýdıtorııany bekerden-beker tańdaǵan joq. Besinshi shaqyrylymdaǵy Májilis depýtaty Galına Baımahanovanyń atap kórsetýinshe, qazirgi kezde Qazaqstanda jastar tárbıesine kóp kóńil bólý kerek. 90-shy jyldary elimizde jastar máselesi kenje qaldy. Biz sol kezdegi býynnyń tárbıesin álsiretip aldyq. «Elimizge orta býyndaǵy kásipkerler qajet. Alaıda, berilgen bilimniń teń jartysy tárbıe bolýy tıis», – dedi ol. QKHP OK hatshysy Turǵyn Syz­dyqovtyń aıtýyna qaraǵanda, Qazaq­standa kóppartııaly júıeni qoldaý qajet. Degenmen, bul úderistiń qyzy­ǵyna túsip ketpeı, ony zań aıasynda qadaǵalaǵan abzal. Máseleni Qyr­ǵyzstan men Ýkraınadaǵy jaǵdaıǵa jetkizbeý kerek. «Biz áleýmettiń áljýaz tobynyń múddesin qorǵaýǵa tyrysamyz. Biz zańnyń qarapaıym halyqqa qyzmet etkenin qoldaımyz», – dedi T.Syzdyqov. Besinshi shaqyrylymdaǵy Májilis depýtaty Aıqyn Qońyrov ta onyń sózin tiriltip, halyqtyń áljýaz toptary týraly keńinen baıandady. Ol ótken saılanymda «halyqtyq kommýnıster» fraksııasy ǵana ashyq túrde Qazaqstan áıelderiniń zeınet jasyn ulǵaıtý zańnamasyna qarsy shyqqanyn aıtty. О́kinishke qaraı, zań jobasyn keri qaıtarý múmkin bolmady, degenmen, qoǵamdyq pikirdiń áseri qatty boldy. Zań jobasy keıinge qaldy. Al onyń júzege asyrylýy qalaı bolady, ony ýaqyt kórsetedi», – dedi ol. Sonymen qatar, A.Qońyrov kommýnıster jol qozǵalysy júıesine júrgizilgen reformalarǵa qatysty pikir bildirgende júrgizýshilerdiń múddesin qorǵaǵanyn jetkizdi. «Aýyl sharýashylyǵy kooperasııalary týraly» zań jobasy talqylanǵanda da belsendilik tanyttyq. Biz zań­dar­dy adamdardyń oqýyna, jumys isteýine, jaqsy ómir súrýine jáne damýy­na yńǵaıly etip ózgertkimiz keledi. Parlamentke osy maqsatqa jetý úshin baramyz. Biz sizderdiń qoldaý­laryńyzǵa senemiz!», – dep qorytty sózin A.Qońyrov. Talǵat SÚIINBAI, «Egemen Qazaqstan». ALMATY.