Kendi Altaıdaǵy qaýyshý

Elordadan shyqqan «Máńgilik El» poıyzy Shyǵys óńirine keldi. Aldymen Aıagóz aýdanyndaǵy Aqtoǵaı stansasyna kelgen poıyzdaǵy meımandardy shyǵysqazaqstandyqtar merekelik konsertpen qarsy aldy. Odan keıin Jarma aýdanynyń Shar qalasyna aıaldady. Jalpy, «Máńgilik El» poıyzy Shyǵys óńirinde bes qalaǵa toqtady. Onyń ishinde О́skemen men Semeı jáne Zyrıan qalalary bar. El Táýelsizdiginiń 25 jyldyq mereıtoıy sheńberinde jolǵa shyqqan poıyz quramynda «Máńgilik El» ıdeıasy men bes ınstıtýttyq reformany túsindirý, áleýmettik máseleler boıynsha keńes berý úshin 96 adamnan turatyn Qazaqstan halqy Assambleıasynyń músheleri, ǵalymdar, sarapshylar endi. Sonymen birge, 33 bilikti dáriger bar. Medısına qyzmetkerleri poıyz toqtaǵan qalalar men kentterde qabyldaýlar ótkizip, halyqtyń densaýlyǵyn tekserip, keńes berdi. Sondaı-aq, elimizdiń Ádilet, Bilim jáne ǵylym, Densaýlyq saqtaý jáne Áleýmettik damý, Indýstrııa jáne jańa tehnologııalar mınıstrlikteriniń, «Atameken» ulttyq kásipkerler palatasynyń sarapshylary jergilikti tur­ǵyn­dardy qabyldap, konsýltasııa ótkizdi. Oblys ortalyǵyna jeksenbi kúni jetken máńgilikeldikterdi qala turǵyndary «О́skemen-1» temirjol vokzalynan shat-sha­dy­man kóńil-kúımen kútip aldy. – Qazaqstannyń injý-mar­janyna sanalatyn týǵan je­ri­­mizge kelgenderińizge óte qýa­nysh­tymyz. Táýelsizdigimizdiń tarıhy – tabysty elimizdiń uly jyl­­namasy. «Máńgilik El» – biz­diń babalarymyzdyń armany, qazaq­standyqtardyń ortaq ult­tyq ıdeıasy. Osyndaı kúrdeli kezeń­­de Qazaqstan halqy óziniń keli­­simimen, dostyǵymen, taǵat­tyly­ǵymen álemge úlgi bolyp otyr, – dedi О́skemen qalasynyń ákimi Temirbek Qasymjanov. «Máńgilik El» poıyzynyń jetekshisi Ámirjan Álpeıi­sovtiń aıtýynsha, atalǵan jo­baǵa qatysýshylar úshin Abaı men Shákárim, Muhtar sııaqty ulylardy syılaǵan qasıetti jerge aıaq basý – úlken qýanysh. – Biz Shyǵys Qazaqstan óńir­iniń turǵyndaryna rıza boldyq. О́ıtkeni, óz Ota­nyn súıetin adamdardy kór­dik. Olardyń janarynan se­nimdiliktiń ushqynyn baıqaı­syz. Barlyǵy elimizdiń gúl­denýine, kórkeıýine eńbek etkisi keledi. 2016 jyl – erekshe jyl. Biz bul jyldy áleýmettik máse­lelerdi sheshýden bastap otyrmyz, – dedi ol. Máselen, poıyz­daǵy dárigerler qaýymy Zyrıan qalasynda – 334, Shar qala­syn­­da 490 adamnyń den­saý­lyǵyn tek­serip, medı­sı­na­lyq qory­tyndy jasaǵan eken. О́skemende jalpy­res­pýb­lıkalyq aksııaǵa qatysý­shylar óńir jastarymen dóń­gelek ústel basynda kezdesti. Memlekettik-áleýmettik tapsyrystar aıasynda júzege asyrylǵan birqatar jobalar tanystyryldy. D.Serikbaev atyndaǵy Shyǵys Qazaqstan memlekettik tehnıkalyq ýnı­versıtetinde ótken kezde­sýde «Táýelsizdik tarıhy – Ult rýhynyń kór­set­­kishi» taqyrybymen tusaý­keser-dárisi, «Máńgilik El – ult kelesheginiń rýhanı negi­zi» atty ekijaqty suh­bat ótti. Sonymen birge, meı­man­dar S.Amanjolov atyn­daǵy Shy­ǵys Qazaqstan memle­kettik ýnıversıtetinde «Táýel­sizdikke – 25 jyl» atty ki­tap kórmesin tamashala­dy. Qonaqtarǵa ýnıver­sıtet murajaıy, «Zııatker» ǵy­lymı-zertteý ortaly­ǵy men dárishanalar tanys­tyryldy. О́zderiniń bilim-bi­­likterin kórsetken jastar­dyń ǵylymı jobalary men ózge de jumystaryn dele­gat­tar joǵary baǵalady. Aýyl sharýashylyǵy men kásip­­kerlikti óristetý boıyn­sha dóńgelek ústelder uıym­das­tyryldy. Ulttyq kásip­kerler pa­la­tasynyń ókili Qura­laı Qanahına óńir kásip­­ker­lerine naýryz aıynan bas­tap «Kásipkerlikti damy­­týdyń aımaqtyq kartasy» iske qosylyp, barlyq óńir­lerdegi shaǵyn jáne orta bıznestiń damý deńgeıi, prob­lemalyq máseleleri men áleýeti, kásip­kerlerdiń usynys­tary arnaıy portalda jarııa­lanyp, bıznestiń alǵa basýyna taǵy da bir erekshe jaǵdaı tý­ǵyzylatynyn jetkizdi. Dýman ANASh, «Egemen Qazaqstan». Shyǵys Qazaqstan oblysy.